Sıfrly mobıldilik pen shekaralardyń ashylǵan dáýirinde sıfrlyq ınfraqurylymnyń álemdik naryǵymen básekelesý kóptegen elderdiń kún tártibine enip otyr. Sıfrly ekonomıkanyń beleń alýymen aqparattyq tehnologııalar salasyndaǵy talantty mamandarǵa da suranys artyp otyr. Sol sebepti «Astana» halyqaralyq qarjy ortalyǵy byltyrdan bastap AHQO bıýrosy negizinde baǵdarlamashy ınjenerler men ázirleýshilerge arnalǵan mamandandyrylǵan baǵdarlamany júzege asyryp otyr. Ondaǵy basty maqsat halyqaralyq sertıfıkattaý baǵdarlamalary men bilim berý tehnologııalary arqyly bilikti maman daıyndaý.
QWANT joǵary tehnologııa mektebi Eýropa men AQSh-tyń eń úzdik baǵdarlamalaý mektepteriniń aldyńǵy qatarly tájirıbelerin qamtıtyn Kremnıı alqabynyń sıfrlyq platformasy – QWASAR arqyly biliktilik arttyrý men suranysqa ıe kásip meńgerýge nıetti barlyq azamatqa múmkindik usynady.
QWANT-tyń oqytý ádistemesi tájirıbelik bilim alý, ózara baǵalaý, jobalyq basqarý, geımıfıkasııa jáne róldik modeldeý prınsıpterine negizdelgen. Oqý prosesi jumys barysyna barynsha jaqyn orta qalyptastyra otyryp qurylǵan, al baǵdarlamaǵa qatysýshylar berilgen tapsyrmany jekeleı de, toppen de oryndaı otyryp kún saıyn mashyqtaryn shyńdaı túsedi. Sonymen qatar oqý barysynda baǵdarlamalaý tiline tereńnen boılaı otyryp, árbir qatysýshy avtomatty júıe arqyly óz áriptesterine baǵa berip, úırete alady.
QWANT jobasynda oqytýshylar men leksııa joq. Júıeniń ereksheligi keń qamtylýy men qashyqtan jumys isteýge múmkindik berýinde. Bul oqý prosesiniń sapasyn saqtaı otyryp barynsha kóp kandıdatqa paıdaly bilim berýge múmkindik beredi.
6 aı boıy QWANT baǵdarlamasy boıynsha sertıfıkat alý úshin irikteýden ótken kandıdattar myna salalarda óz mashyqtaryn damytady: qoldanbaly baǵdarlamalaýdyń ınterfeısi, jasandy ıntellekti tájirıbelik baǵdarlamalaý, veb-ınfraqurylym, mashınalyq oqý, mobıldi qosymsha. Úmitkerlerge talaptar negizgi eki parametrmen qoıylady: baǵdarlamalaý negizderin bilý jáne aptasyna 40 saǵattan artyq ýaqyt boıy belsendi oqýǵa yntasynyń bolýy.
Aldaǵy ýaqytta QWANT bastaýysh baǵdarlamashylar úshin de, sıfrlandyrý men IT salasyndaǵy basshylar úshin de usynylatyn oqý baǵdarlamalarynyń tizimin aıtarlyqtaı keńeıtedi. Platformaǵa osy salaǵa mamandanǵan JOO-lar, sonyń ishinde óńirlerdegi mamandanǵan JOO-lar da qosyla alady.
«Zerde» Ulttyq ınfokommýnıkasııa holdıngi AQ ózara qol qoıylǵan túsinistik týraly memorandým aıasynda QWANT jobasyn qoldaýǵa nıetti. Ondaǵy maqsat ekonomıkanyń basym sektorlaryn tıimdi sıfrlandyrýǵa baǵyttalǵan bilim berý boıynsha sıfrlyq bastamalardy damytý. Sonymen qatar halyqtyń sıfrlyq saýatyn arttyrý men kásibı mamandardy daıarlaý baǵyty boıynsha «Sıfrlyq Qazaqstan» baǵdarlamasyn iske asyrý sharalary aıasynda QWANT jobasy jańadan bastaǵan adamdarǵa baǵdarlamalaý mashyqtaryn jappaı úıretý kýrsyn da daıyndap jatyr.
Aı ortasynda bastalatyn birinshi oqý baǵdarlamasyna ótinim qabyldaý 4 sáýirge deıin ashyq.
