Əskerı qyzmetshiler qan tapsyrý aldynda barlyǵy qajetti tekserýden ótip, qan tobyn anyqtaýǵa taldaý jasaldy. Donorlyq aksııa barysynda áskerı qyzmetshiler jalpy alǵanda 45 lıtrge jýyq qan tapsyrdy.
«Búgin men jáne meniń qarýlas qyzmettesterim qan tapsyrdy. Bizdiń elimiz osyndaı jaǵdaıda bolǵanda, biz jaı ǵana shette qalmaýymyz kerek. Donorlyq qanǵa degen qajettilik árqashan, ásirese dəl osyndaı ýaqytta kerektigin barlyǵymyz bilemiz. Múmkin meniń qanym bireýdi qutqarady. Men osylaı qoldan kelgenshe kómekteskenime qýanyshtymyn. Bizdiń áskerimiz ben halqymyz árdaıym birtutas ekendigin aıtqym keledi», deıdi 55765 áskerı bóliminiń áskerı qyzmetshisi Azat Jarqymbaı.
Nur-Sultandaǵy karantın rejimine baılanysty, azamattardyń qaýipsizdigin saqtaý jáne qan qorynyń qysqarýyna jol bermeý úshin qalalyq qan ortalyǵy donorlardy úıden arnaıy kólikpen alýǵa daıyn ekendikterin aıtty.
«Biz karantındik rejimnen qoryqpaı donorlardy shaqyrdyq, qan qoryn toltyrý úshin barlyq donorlardy qamtýǵa tyrystyq. Birinshi kezekte Qorǵanys mınıstrligi shaqyrtyldy. Búgin bizde 100-den astam áskerı qyzmetshi qatysqan aksııa ótkizildi», deıdi donorlyq jıyn bólimshesiniń meńgerýshisi Elmıra Kópeeva.
Áskerı qyzmetshiler – turaqty donorlar. Arnaıy aksııalar aıasynda ofıserler men serjanttar únemi qan tapsyrady. Ol onkologııalyq naýqastarǵa, bosanatyndar men túrli jaraqat alǵan adamdarǵa kómek kórsetý úshin qajet, sondyqtan donorlyq qordy únemi tolyqtyrý qajet.
