Qazaqstan Prezıdenti Nursultan Nazarbaev «Úlken jıyrmalyqtyń» sammıtine qatysý úshin Sankt-Peterbýrgke keldi, dep habarlady Qazaqstan Respýblıkasy Prezıdentiniń baspasóz qyzmeti.
Sapar barysynda Memleket basshysynyń G20 sammıtiniń jumysyna qatysýy, shet memleketter jáne halyqaralyq uıymdar basshylarymen ekijaqty kezdesýler ótkizýi josparlanǵan.
Daǵdaryspen birlesip kúresý qajet
Qazaqstan Prezıdenti Nursultan Nazarbaev Sankt-Peterbýrgtegi G20 sammıtiniń sessııasynda sóz sóıledi, dep habarlady Prezıdenttiń baspasóz qyzmeti.
Nursultan Nazarbaev shaqyrýǵa rızashylyǵyn bildirip, jahandyq daǵdarystyń bir sebebi ekonomıkanyń naqty sektorymen baılanyssyz «sabyndy kóbik» túrindegi qarjylyq qurylymdardyń qarqyndy damýy bolyp tabylatynyn atap ótti.
Memleket basshysy mańyzdy álemdik sheshimderdi qabyldaý kezinde kóptegen damýshy elderdiń ustanymy is júzinde nazarǵa alynbaıtynyn aıtty.
– Qazaqstan tárizdi elderdiń de pikiri elenýi úshin budan eki jyl buryn meniń tarapymnan G-GLOBAL jobasy bastama retinde kóterildi. Ol G8-ge jáne G20-ǵa balama emes, qazirgi kezde aqparattyq-kommýnıkatıvtik alań retinde iske asyrylyp jatqan jahandyq dıalogtyń qosymsha quraly ǵana, – dedi Qazaqstan Prezıdenti.
G-GLOBAL-dan bólek Qazaqstannyń bastamasy boıynsha BUU Bas Assambleıasynyń qoldaýymen Astanada 104 eldiń ekonomıkalyq vedomstvolary jetekshileriniń qatysýymen Daǵdarysqa qarsy búkilálemdik konferensııa ótkizildi. Osy ınnovasııalyq jahandyq dıalog pishinine basa nazar aýdarǵan Nursultan Nazarbaev meılinshe ózekti problemalardy sheshýge qatysty óz kózqarasyn ortaǵa saldy. Osylaısha álemdik qarjyvalıýtalyq arhıtektýrasy barlyq eldiń múddesin saqtaýǵa evolıýsııalyq jolmen kelýge tıis.
Memleket basshysynyń kelesi usynysy álemdik ekonomıkadaǵy boryshkerlik qatynastardy teńdestirýge baılanysty boldy.
– Memlekettik jáne korporatıvtik qaryz alý kólemin retteýdiń jáne baqylaý jasaýdyń jańa elementterin ázirleý ári engizý usynylady, – dedi Qazaqstan Prezıdenti.
Nursultan Nazarbaev daǵdarysqa qarsy kúreste óńirlik yqpaldastyqtyń mańyzdy ról atqaratynyn aıta otyryp, Qazaqstan, Reseı jáne Belarýs qurǵan Keden odaǵyn mysalǵa keltirdi.
– Qazaqstan da Dúnıejúzilik saýda uıymyna kirýdiń qorytyndy kezeńinde tur. Bul oraıda osynda otyrǵan memleketter men úkimetter basshylarynan 2013 jyldyń sońyna deıin Qazaqstannyń DSU-ǵa kirýine qoldaý kórsetýdi suraımyn, – dedi Memleket basshysy.
Buǵan qosa, Qazaqstan Prezıdenti bizdiń elimiz G20-nyń «Jasyl klımat qory» jónindegi bastamasyn qoldaıtynyn málimdeı kele, «Bolashaqtyń energııasy» taqyrybynda EKSPO-2017 halyqaralyq kórmesiniń Astanada ótetini Qazaqstannyń «jasyl ekonomıkany» jańǵyrtýynyń aıǵaǵy ekenine toqtaldy.
Sóziniń sońynda Nursultan Nazarbaev aıtylǵan usynystardyń nazarǵa alynyp, atalǵan salalardaǵy qyzmettiń jandana túsetinine senim bildirdi.
