OTANDYQ ÚLES ÚSTEMELENÝGE TIIS

Elbasy N.Nazarbaevtyń bıylǵy Qazaqstan halqyna Joldaýynda bergen tapsyrmalaryn iske asyrý maqsatynda Premer-Mınıstr Kárim Másimovtiń qatysýymen qazaqstandyq úlesti damytý máselesine arnalǵan respýblıkalyq semınar-keńes ótti. Birqatar mınıstrlikter men jer­gilikti atqarýshy organdardyń, ulttyq kompanııalar men iri kásip­oryndardyń basshylary qatysqan “Qazaqstandyq úles-2020” semınar-keńesinde taýarlar, jumystar men qyzmetterde otandyq úlesti arttyrý jumysynyń ótken jylǵy qorytyndysy men bıylǵy jylǵa arnalǵan josparlar talqylandy. О́tken jyly 600 mlrd. teńge somasyna 396562 memlekettik satyp alý týraly sharttardyń mindettemeleri oryndaldy. Qazaqstandyq taýarlar, jumystar men qyzmetter 464,8 mlrd. teńgege nemese 77,5 paıyzǵa satyp alyndy. Qazirgi kezde iri ulttyq kompanııalardyń basyn birik­tiretin “Samuryq-Qazyna” AQ ótken jyly otandyq úlesti damytý maqsatynda 1 trln. 541,5 mlrd. teńgege sharttar jasasty. Al júıe quraýshy kásip­oryn­dardyń taýarlar, jumystar men qyzmetterdi satyp alýdaǵy jalpy kólemi 471,4 mlrd. teńgeni qurady. Jer qoı-naýyn paıdalanýshy komp­a­nııa­lardyń satyp alýlary 690 mlrd. teńgege jetti. Sonyń ishinde qazaqstandyq taýarlar, jumystar men qyzmetter 408,1 mlrd. teńgege satyp alyn­dy. Keńeste sóz alǵan Vıse-premer – Indýstrııa jáne jańa tehnologııalar mınıstri Áset Isekeshev qazirgi kezde qazaqstandyq úlesti arttyrý boıynsha jumystardyń tıisti deńgeıde júrgizilip jatqanynan habardar etti. Osy jyldyń qańtar aıynan qazaqstandyq úles máselesine arnalǵan arnaıy zańnyń kúshine enýimen búgingi tańda elimizdiń óndiris salasynda otandyq úlestiń kólemi 52 paıyzǵa, “Samuryq-Qazyna” qorynyń bas­qarýyndaǵy salalarda 63 paıyzǵa, júıe quraýshy kompanııalarda 64 paıyzǵa jetken. Keńeste Vıse-premer qazaqstandyq úlesti arttyrý boıynsha Úkimet tarapynan istelinip jatqan jumys­tardyń taǵy bir mańyzdysy retinde artta qalǵan óndiris tehnologııalaryn qaıta jańartyp, otandyq brendti qalyptastyrý maq­satynda kon­s­trýktorlyq bıýrolardy ashýdy josparlap otyrǵanyn málimdedi. Semınardy Úkimet basshysy Kárim Másimov qorytyndylady. Ol búgingi tańda otandyq úles pen óndiristi órkendetý elimiz táýelsizdiginiń máselesi bolyp, bizdiń ár qadamymyz osy talapqa jaýap berýi kerektigin atap ótti. Sonymen birge ol qazaqstandyq úlesti arttyrý úshin Elbasynyń Úkimet aldyna qoıǵan barlyq tapsyrmalary der kezinde oryndalyp, oǵan barlyq ulttyq holdıngter men iri kompanııalar, jergilikti atqarýshy organdar atsalysýy kerektigin aıtty. Sóziniń sońynda Úkimet basshysy óńirlerdi damytý jáne otandyq úlesti arttyrý maqsatynda bıýdjetten jyl saıyn qomaqty qarjy bólinetinin, olardyń tıimdi jumsalyp, halyqqa jáne óndiriske jumys isteýi úshin mem­le­kettiń barlyq múmkindikti jasaı­tynyn aıtyp, bıýdjetten jylda bólinetin qarjy eń aldymen ishki su­ranysty qalyptastyrýy qajettigin málimdedi. Osy oraıda ishki suranysty qalyp­tastyrmaı otandyq óndiristi damytý qıynǵa túsetinin eskertken ol dál qazirgi ýaqytty elimizdiń táýel­sizdigin nyǵaıtý otandyq úlespen baılanysty bolyp turǵanyn, olaı bolsa barshanyń da osy jaýapty iske jumyla kirisýi ke­rektigin jetkizdi. Dastan KENJALIN.