Aqpan aıynda taǵaıyndalǵan Jambyl oblysy Polısııa departamentiniń basshysy Janat Súleımenov eki aı ýaqytta departamentpen atqarylǵan jumystardy qorytyndylady. Jedel keńesti PD basshysy J.Súleımenov ózi júrgizip, kún tártibindegi qaralatyn suraqtardy atap ótti. Eki aıdyń qorytyndysy boıynsha oblys aýmaǵynda qylmys sany ótken jyldyń osy kezeńimen salystyrǵanda 27,5%-ǵa azaıǵan. Atqarylyp jatqan is-sharalardyń nátıjesinde birqatar negizgi baǵyttar boıynsha oń kórsetkishterge qol jetkizilgen.
Atap aıtqanda, asa aýyr qylmystardyń ashylýy 18%-ǵa; kisi óltirý qylmysynyń ashylýy 88,9%-dan 100%-ǵa; kisi óltirýge oqtalý qylmysynyń ashylýy 100%-ǵa joǵarylaǵan. Sondaı-aq, qaraqshylyq qylmystarynyń tirkelýi 20%-ǵa tómendep, ashylýy 100%-ǵa, buzaqylyq qylmystarynyń ashylýy 50%-dan 100%-ǵa artqan. Jalpy urlyqtardyń ashylý kórsetkishi 17,1%-ǵa (75%-dan 92,1%-ǵa), onyń ishinde páter urlyǵyn ashý 19%-ǵa (66,7%-dan 85,7%-ǵa) joǵarylaǵan. Qoǵamdyq oryndarda jasalǵan qylmystar sany 29%-ǵa tómendegen. Júrgizilgen profılaktıkalyq jumystardyń nátıjesinde kámeletke tolmaǵandarmen jasalynǵan qylmystardyń 53,8%-ǵa, mas kúıinde jasalynǵan qylmystardyń 41,9%-ǵa tómendeýine qol jetkizildi. Oblys boıynsha aýyr qylmystardyń ashylý paıyzy 79,2-ni qurady.
Keńes barysynda departament basshysy qalalyq jáne aýdandyq polısııa bólimderiniń basshylaryn tyńdady. J.Súleımenov statıstıka úshin emes, halyq úshin jumys jasaý kerektigin jetkizdi. Sonymen qatar, PD basshysy keıbir basshylarǵa memlekettik tildi meńgerý kerektigi týraly eskertpe aıtty.
Sondaı-aq, jeke quram arasynda jemqorlyq derekteri anyqtalsa, qyzmetkermen qatar basshysynyń jumystan ketetini bir bólek, ony jaýapqa tartý týraly tilge tıek etti. Jedel keńes barysynda J.Súleımenov ár aýdandyq polısııa bólimderiniń basshylary aımaqtyń jaǵdaıyn tolyq meńgermeıtini týraly da toqtaldy. Jalpy qorytyndylaı kele, atqarylyp jatqan jumystar men oblystaǵy jedel jaǵdaıǵa oń baǵa bergen PD basshysy áli de kezdesetin kóptegen kemshilikti joıý boıynsha naqty tapsyrmalar berdi.
