Talıbterden qashqany jaıly kitap jazǵan áıelder quqyǵyn qorǵaýshy – Sashmıta Banerdjı Aýǵanstannyń Paktıka provınsııasynda sodyrlardyń qolynan qaza tapty. Bul týraly provınsııa gýbernatorynyń baspasóz hatshysy Djanbaz Hannyń málimetine silteme jasaı otyryp, ITAR-TASS habarlady.
Samshıta Banerdjı Úndistannyń týmasy. Ol ıslam dinin qabyldap, aýǵan kásipkerine turmysqa shyǵady. Aýǵanstanǵa kelip, Paktıka provınsııasyndaǵy aýrýhanalardyń birinde akýsher bolyp qyzmet atqarady.
О́z kitabynda Banerdjı Aýǵanstandaǵy ómiri jaıly jazady. Onyń ómirindegi jaısyzdyqtar 1993 jyly bılik basyna talıbter kelgen kezde bastalady. Talıbter ony qyspaqqa alyp, shaǵyn dárihanasyn japqannan keıin, 1994 jyly Banerdjı Pákistanǵa qashyp ketedi. Alaıda, qyzdyń bul áreketi otbasyna kir keltiredi degen týystary ony Aýǵanstanǵa qaıtarady. Talıbter áıelge «buzylǵan» degen aıyp taǵyp, ony úıqamaqta ustaıdy. Oǵan qosa qatań jazalaıtyndaryn eskertip, qorqyta bastaıdy. Sol kezde Banerdjı qabyrǵanyń astynan jol qazyp shyǵyp, úıden qashyp ketedi. Talıbter ony Qabýl mańynda qolǵa túsirip, kúıeýinen qashqany úshin óltirmek bolady. Alaıda, áıel Úndistan týmasy bolyp keletinin jáne týǵan jerge oralýǵa quqyǵy bar ekenin túsindiredi. Aqyry talıbter ony Úndistan elshiligine jetkizip, Samshıta Banerdjı eline oralady.
Banerdjı bolǵan oqıǵanyń barlyǵyn qaǵaz betine túsirip, kitap jazyp shyǵarady. 2003 jyly Úndistanda atalmysh kitaptyń negizinde «Talıbandardan bas saýǵalaý» atty fılm túsirildi.
Jaqynda Banerdjı ótken oqıǵalar umytylǵan bolar degen senimmen Aýǵanstanǵa qaıta oraldy. Degenmen, sodyrlar onyń kitaby «Talıbandardy» masqaralady dep uıǵaryp, áıeldiń kózin joıady.
Aıdar О́risbaev.
