Aımaqta dert juqtyrǵandardyń kóbeıýine baılanysty shekteý sharalarynyń qatańdatylǵany belgili. Al onyń oryndalýyn saralaǵan Shamshıddın Ámıtov az ýaqyt ishinde QR Ákimshilik quqyq buzýshylyq kodeksiniń 476 babyn saqtamaǵan 526 fakti anyqtalǵanyn atap ótti. Osyǵan baılanysty sotta 236 ákimshilik is onlaın túrde qaralyp, 112 adamǵa 10 aılyq eseptik kórsetkish somasynda aıyppul salynyp, 124 turǵyn ákimshilik qamaqqa alynǵan.
Osyǵan qaramastan áli de karantın talabyna baǵynbaı, óziniń de, ózgeniń de ómirin qaterge tigip júrgender az emes.
Mysaly, 13 sáýir kúni «Nur Otan» partııasy oblystyq fılıalynyń ǵımaraty aldyna áleýmettik kómektiń jaı-japsaryn bilmek bolǵan top adamnyń jınalǵany belgili boldy. Jergilikti atqarýshy organ men prokýratýra ókilderiniń túsindirmesinen keıin toptaǵylardyń birazy tarady. Jurtty jınalýǵa úndep, tártipke baǵynbaǵan 27 jastaǵy qala turǵyny sotqa tartylyp, 10 AEK kóleminde aıyppul arqalady, – dedi Shamshıddın Ámıtov.
Tártip buzǵannan keıin de polıseılerge baǵynbaı, balaǵattaǵan taǵy bir turǵynnyń isin sotqa deıingi tergep-tekserý bastaldy. Aıyby anyqtalsa, onyń da jazasy jeńil bolmaıyn dep tur.
Kúni keshe ǵana oblystyq bas sanıtarlyq dárigeriniń №9 qaýlysy qabyldandy. Soǵan sáıkes, karantın kezinde qalaǵa kirip-shyǵýǵa ruqsat alǵan kólikter sany taǵy qysqardy. Búgin baqylaý beketterindegi uzyn-shubaq kezek osyǵan baılanysty týyndap otyr. Jergilikti bılik osy máseleni jedel sheshý joldaryn qarastyrýda.
Polısııa departamenti basshysynyń orynbasary qazirgi jaǵdaıǵa baılanysty áleýmettik jelilerge de turaqty monıtorıng jasalyp otyrǵanyn jetkizdi. Jeli arqyly jalǵan aqparat taratyp, jurtty dúrliktirgender de jazasyz qalmaıdy.
