Josparǵa sáıkes, 15 sáýir kúni bas qaladaǵy qurylys jumystary aıaqtaldy. Qazir baılanys montajy men árleý jumystarynyń sońǵy kezeńi júrgizilip jatyr. Keste boıynsha, 17 sáýirde aýrýhana jumysyn bastaıdy.
– Juqpaly aýrýhanany mundaı qysqa merzimde turǵyzý – kúrdeli tehnıkalyq mindet. Jobaǵa ózgerister engizýge jáne ony birden obektide eskerýge týra keldi. Bul qıyndyqtarǵa qaramastan qoıylǵan mindetterdi oryndap shyqtyq. Elordadaǵy aýrýhanaǵa nemis tehnologııasy boıynsha jasalǵan modýldik bloktar salyndy. Bul tehnologııa qurylysty qysqa merzimde aıaqtaýǵa múmkindik bergenin aıta ketkenimiz jón. Qurylys kezinde qalanyń aýa raıy da eskerildi, – dedi joba ınjeneri Aısar Jaǵalshın.
Almatydaǵy aýrýhana vahtalyq qalashyq tıpinde salynyp jatyr. Qurylysshylar ýaqyt pen bıýdjettiń tyǵyz bolýyna baılanysty batystaǵy munaı jumystary úshin qoldanylatyn qalashyq úlgisin negizge alǵan. Úsh keshenge tolyqtaı medısınalyq gazdar júrgiziledi. Shymkenttegi aýrýhanany salýda konteınerlik tıpten temirbetonǵa deıingi barlyq nusqalar qarastyrylǵan. Dese de jumys sál keshteý bastalmaq. Oǵan sebep: aýrýhana formatynyń ózgesheliligi.
– Qarqyndy jumys istesek, qalǵan ýaqytta qýyp jetemiz degen oıdamyn. Oǵan alańdaýdyń qajeti joq. Barynsha belsendi bolýǵa tyrysyp jatyrmyz. Nur-Sultandaǵy qurylysta túrli saladaǵy 130-ǵa jýyq, Almatyda 150-ge jýyq brıgada jumys isteýde. Olardyń barlyǵynda 1300-ge tarta qurylysshy bar. Qazir árleý jumystary bastaldy. Jumystar kestege sáıkes júrgizilýde, – dedi A.Jaǵalshın.
Qazirgi ýaqytta «BI Group» qurylys kompanııasy Almaty men Nur-Sultandaǵy aýrýhanany salyp jatyr. Al Shymkenttegi nysan jobasynyń parametrlerin dárigerler men bılik ókilderi naqtylaýda. Joba dırektory Arman Lesbekov eshteńege alańdaýdyń reti joqtyǵyn aıtady.
– Jumys sapasy qazaqstandyq talaptarǵa ǵana emes, Dúnıejúzilik densaýlyq saqtaý uıymynyń talaptaryna da sáıkestendirilgen. Jumys sapasy memleket pen dárigerler tarapynan únemi baqylanady. Barlyq aýrýhanada aq jeleńdi abzal jandarǵa arnalǵan ordınatorlyq bólmeler, kabınetter bolady. Máıit saqtaıtyn oryndar da negizge alynǵan, – dedi A.Lesbekov.
Onyń aıtýynsha, qurylys materıaldary tolyqtaı jetkilikti. Barlyq kerek-jabdyqtar – otandyq ónim. Sondyqtan syrttan ákelý týrasynda máselesi joq. Sheteldik materıaldar kerek bolǵan jaǵdaıda, «jasyl dálizder» arqyly memleket qoldaý kórsetedi. Mysaly, jaqynda Belarýs elinen germetıkalyq esikter ákelinipti. El bıligi gospıtaldik esikterdi jetkizý úshin arnaıy charterlik reıs uıymdastyrýǵa kómektesken.
Aıta keteıik, Nur-Sultan men Shymkenttegi aýrýhana bir kúnde 200 naýqasty qabyldaı alady. Árqaısysynda 20 oryn ıntensıvti terapııaǵa arnalmaq. Almatyda 280 oryn bolsa, onyń 28-i ıntensıvti terapııaǵa beriledi. Nysandar Modex zaýyty jasaıtyn modýlderden qurylǵan. Mamandardyń aıtýynsha, mundaı monolıttik qurylystardy 50-70 jyl boıy paıdalanýǵa bolady.
