Barlyq áskerı bólimder qosymsha dári-dármekpen, al áskerı qyzmetshiler-medısınalyq maskalar men zalalsyzdandyrý quraldarymen qamtamasyz etilgen. Jeke quramdy tekserý úshin baqylaý-ótkizý pýnkteri medısınalyq súzgiler ornatylǵan.
«Bólimniń baqylaý-ótkizý pýnktinde árdaıym kezekshi dárigerler bar. Biz barlyq áskerı qyzmetshini tekserýden ótkizemiz, dene qyzýyn ólshep, saýalnama júrgizemiz», dedi dáriger-terapevt, kapıtan Aıgúl Raqymjanova.
Jeke qurammen aldyn-alý sharalary, syrqattyń belgileri eskertilip, juqtyrý bolǵan jaǵdaıda áreket etý algorıtminiń túsindirý jumystary júrgizildi.
Karantın aıasynda qyzmet jasap jatqan áskerı qyzmetshilerdiń syrqattanýyn aldyn-alý máselesi erekshe nazarda. Blok-beketter, patrýldeý toptary jáne dezınfeksııalaý otrıadtaryna medısınalyq tekserý men shaǵymdar jóninde saýalnama júrgizetin medısınalyq qyzmetkerlerdiń toptary bólindi.
Bıologııalyq qorǵanys bólimsheleri kún saıyn vırýstyq qaýpi bar nysandarda jumys atqarǵandyqtan, kezekti dezınfeksııalaý jumystary aıaqtalǵannan keıin áskerı qyzmetshiler, olardyń jabdyqtary, quraldary men tehnıka tolyqtaı zalalsyzdandyrylady. Kezekshi dárigerdiń árbir jaýyngerdiń densaýlyq jaǵdaıyn tekserýinen keıin, monshada jýyný da uıymdastyrylǵan. Barlyq prosedýralardy ótkennen keıin áskerı qyzmetshiler aýystyrý kıim-keshekterin, sterıldi qorǵaný kombınezondaryn alady.
Barlyq áskerı nysandardyń sanıtarlyq-gıgıenalyq jaǵdaıy qatań baqylaýǵa alynǵan. Bólim aýmaqtary, qyzmettik jáne kazarmalyq úı-jaılarda dezınfeksııalaý jumysy júrgiziledi. 85395 áskerı bólimi radıasııalyq, hımııalyq jáne bıologııalyq qorǵaý qyzmetiniń bastyǵy maıor Jeńisbek Baıteleýov árbir adamnyń densaýlyǵyn saqtaý jáne armııalyq ortada vırýsty juqtyrýdy boldyrmaý úshin áskerı bólimderdiń ishin de dezınfeksııalaýdyń qanshalyqty mańyzdy ekendigin atap ótti.
Jeke quram ornalasqan shatyrlar blok-beketter kúnine eki ret óńdeledi. Áskerı ushaqtar da sanıtarlyq óńdeýden ótedi. Tótenshe jaǵdaı kezinde áskerı ushqyshtar bir óńirden basqa óńirge adamdar men júkterdi tasymaldaýdy, shetelden qazaqstandyqtardy evakýasııalaýdy qamtamasyz etýmen aınalysady. Dezınfeksııalaý ár ushýdan keıin júrgiziledi.
Jaýyngerlik ázirlikke nuqsan keltirmeıtindeı vırýsty juqtyrý qaýpin azaıtý úshin bólimsheler jaýyngerlik ázirlikti jabyq rejımde ótip jatyr. Keıbir qurylymdyq bólimshelerdiń jeke quramy qyzmetti aýysymmen atqarsa, 30%-ke jýyǵy úı jaǵdaıynda oqshaýlanýda. Sheteldik issaparlardan, oqýdan nemese demalystan kelgender karantınge jabylyp, áskerı dárigerlerdiń baqylaýyna alyndy.
Koronavırýstan qorǵaý sharalardy oryndaýdy iske asyrýda QR QK Bas áskerı-medısınalyq basqarmasy sanıtarlyq-epıdemıologııalyq basqarmasynyń qyzmetkerlerine júktelgen. Olar áskerdegi sanıtarlyq sharalardy baqylaýda ustap, tótenshe jaǵdaı jónindegi komıtetpen, ákimdiktermen, azamattyq sanıtarlyq-ápıdemıologııalyq uıymdardyń qyzmetkerlerimen birlese jumys atqarady, dezınfeksııalaý otrıadtarynyń quramynda bolyp, zaqymdalǵan degen qaýpi bar nysandardy óńdeý jumystaryna qatysady.
Bas áskerı-medısınalyq basqarmasynyń ofıserleri Qorǵanys mınıstrligi jedel shtaby jumys tobynyń, Densaýlyq saqtaý mınıstrliginiń sıtýasııalyq ortalyǵynyń quramyna kiredi, elimizdegi epıdemıologııalyq jaǵdaıdyń jedel dıagnostıkasyn júrgizip, áskerı medısına men densaýlyq saqtaýdaǵy azamattyq mekemelermen ózara baılanys ornatýmen aınalysady.
Áskerden bólek áskerı-medısınalyq qyzmet halyqqa qyzmet kórsetedi. Ol úshin elorda men Almaty qalasy mańynda koronavırýs indetin juqtyrǵan jáne karantındegilerdi qabyldaý úshin mobıldi gospıtalder men shatyrly lagerder qurylǵan. Qosymsha basqa da áskerı gospıtalder men lazaretterdiń resýrstary da daıyndalǵan. Áskerı dárigerlerdiń bir toby kómek kórsetý úshin Qaraǵandyǵa jiberildi.
