14 sáýir kúni Jalaǵash aýdany aýmaǵynda oblys ortalyǵynyń 28 jastaǵy turǵyny polısııa qyzmetkerleriniń zańdy talaptaryna baǵynbaı, olarǵa til tıgizgen. “Toyota-camry” markaly avtokóligindegi bul azamatqa Buqarbaı batyr aýylynyń tusynda ornalasqan sanıtarlyq bekettegi polısııa qyzmetkerleri Jalaǵash kentine kirýge ruqsat bermepti. Ol ózin toqtatqandardy balaǵattap, zańdy talaptaryna baǵynbaı, polıseılerdiń biriniń aıaǵyn kóligimen basyp ótip, oqıǵa ornynan boı tasalaǵan.
Aýdandyq polısııa bólimi qyzmetkerleriniń jedel áreketteri nátıjesinde bılik ókiline til tıgizgen azamat ustalyp, polısııa bólimine jetkizildi. Oǵan qatysty karantın rejımin buzǵany úshin QR Ákimshilik quqyq buzýshylyq týraly kodeksiniń 476-babyna sáıkes ákimshilik is qozǵalyp, aýdandyq sotqa joldandy. Sot qaýlysymen quqyq buzýshy eki táýlikke qamaqqa alyndy.
Odan bólek, bılik ókilin qorlaý deregi boıynsha QR Qylmystyq kodeksiniń 378-babynyń 1-bóligimen sotqa deıingi tergep – tekserý amaldary júrgizilip jatyr.
