KО́KTEMDEI KО́RKEM BAIQAÝ

Sáýirdiń 16-18-i kúnderi elordada ótetin jas oryndaýshylardyń respýblıkalyq HIH “Jas qanat” baıqaýynda on bes úmitker baq synaıdy dep kútilýde. Uıymdastyrýshylary Mádenıet mınıstrligi, Astana qalasy ákimdigi, “Habar” agenttigi men “Azııa da­ýy­sy” dıreksııasy bolyp tabylatyn elimizdegi birden-bir estradalyq jas ánshiler saıysynyń ereksheligi – baıqaýǵa qatysýshylar sanynyń jyldaǵyǵa qaraǵanda óse túsýi de­sek, qanshama ónerli jastyń úlken sahnadaǵy tusaýyn kesip, jurtshy­lyqqa tanytýdaǵy tolaıym eńbegi óz aldyna bir mektep deýge laıyq. Al onyń maqsat-múddesi ne degen máseleni taǵy da bir qysqasha tujy­rymdaıtyn bolsaq, boıyndaǵy án­shi­lik ónerdiń kózin tolyq asha al­maı júrgen elimizdiń túkpir-túk­pi­rindegi jas ánshilerdiń úlken sah­naǵa shyǵýyna qoldaý maqsatyndaǵy memlekettik joba. Oǵan dálel, mysaly, bıyl res­pýb­lıkanyń túrli óńirlerinen 60-tan astam ótinish kelip túsken. Bi­raq, “baq shaba ma, bap shaba ma” de­mekshi, olardyń ózi sońǵy márege jet­kenshe talaı irikteý men su­ryp­taýdan ótip, tek júırikteri ǵana “Jas qanat” baıqaýyna joldama alyp jatady. Bıylǵy úmitkerlerdiń sany ótken jyldarǵa qaraǵanda kó­birek. Áıtse de basty másele onda emes, qazaq estradasy keleshekte taǵy da qandaı jańa esimdermen tolyǵa túser eken degen kópshiliktiń úmitinde. “Jas qanattyń” kókjıegi jyldan-jylǵa keńeıip, elimizdiń barlyq aımaqtaryn qamtýǵa baryn­sha talpynyp jatqany taǵy shyn­dyq. Máselen, sonaý bir jyldary respýblıkanyń ońtústik óńirleri­nen jastar kóbirek qatyssa, sońǵy kezderi sahnany batys óńirdiń tú­lekteri túrlentip jibergen. Al bı­ylǵy joldamanyń kóbi Pavlodar­dyń paıdasyna sheshilgen syńaıly. О́ıtkeni, “Jas qanat” saıysyna bul aımaqtan tórt birdeı qyran saıla­nyp kelipti. Onyń bireýi – estra­dalyq top. Qalǵan ónerpazdar – Kókshetaýdan, Qostanaıdan, Aqtó­be­den, Taldyqorǵannan, Oraldan, Almaty men Astanadan, on jeti men jıyrma alty jasqa deıingi aralyq­taǵy órender. 1992 jyldan beri es­trada sahnasynda 300-den astam úmitti jaǵyp, ónerdiń ustahanasyna ulǵaıǵan baıqaýdyń bıylǵy baq­shasy da óner jemisine tolyp, shyn júıriktiń mereıi ústem bolady degen senimdi serik etkimiz keledi. “Egemen-aqparat”.