«Qyzylorda elektr taratý toraptary» AQ kompanııasynda oblys basshysyna aımaqtaǵy elektr jelileriniń 70 prosenti eskirgeni baıandalyp, stansııalardy jóndeý jumystary jaıly aıtyldy. Bıyl júzege asyrylatyn qaıta qalpyna keltirý jumystaryna oblystyq bıýdjetten 166 mln teńge qaralǵan. Jospar boıynsha aımaqta 52,69 shaqyrym elektr jelisi men qosalqy 14 stansııa jańalanýy tıis.
– 2020-2021 jylǵy jylý berý maýsymyna deıin aǵymdaǵy jáne kúrdeli jóndeý jumystaryn júrgizý josparlanýda. Qazir oblystyń elektr energııasyn tutyný kólemi 98 MVt qurap otyr. Onyń 62,3 MVt (63,6%) syrtqy energııa kózderinen alynsa, 35,7 MVt (36,4%) qýatty «Qyzylorda jylýelektrortalyǵy» MKK men «SKZ-U» JShS óndiredi, - dedi «Qyzylorda elektr taratý toraptary» AQ kompanııasynyń basqarma tóraǵasy M. Kárimbaev.
Gúlshara Naýshaqyzy 1964 jyly paıdalanýǵa berilgen «Qyzylorda jylý elektr ortalyǵy» mekemesinde de boldy. Qyzylorda qalasyn jylý jáne elektr qýatymen qamtamasyz etetin negizgi kásiporyn jylý berý maýsymyn aıaqtap, kelesi jylý berý maýsymyna daıyndyqty bastap ketken.
Aımaq basshysyna 2019-2020 jyldardaǵy jylý berý maýsymynyń turaqty túrde ótkeni jáne jaz aılarynda jóndeý jumystary júrgiziletini aıtyldy. Sondaı-aq, kásiporynnyń halyqaralyq qarjy ınstıtýttarynan alǵan nesıe kólemi jóninde aqparat berildi.
Kásiporyn 2014 jyldyń 18 jeltoqsanynda "Qyzylorda qalasynyń jylýmen jabdyqtaý júıesin salý jáne rekonstrýksııalaý" jobasyn iske asyrý maqsatynda Eýropalyq Qaıta Qurý jáne damý bankimen jalpy quny 37,3 mln AQSh dollary bolatyn kredıttik shart jasasty. Jeńildik kezeńi 3 jyl dep belgilendi. Nesıeni qaıtarý kezeńi bastalyp ketti. 2027 jylǵa deıin qaryzdy tolyq óteýimiz kerek,- dedi «Qyzylorda jylý elektr ortalyǵy» MKK-nyń dırektory R.Nurmaǵanbetov.
Kásiporynnyń №1 gazotýrbınalyq qondyrǵysyn kúrdeli jóndeý josparlanyp otyr. Ol úshin oblystyq bıýdjetten 599 mln teńge bólinip, memlekettik satyp alý jumystary júrgizilýde.
Nysandardy aralaý qorytyndysynda, aımaq basshysy jóndeý, qaıta qalpyna keltirý jumystary kesteden keshikpeı oryndalyp, bólingen qarajat ýaqtyly ári únemdi ıgerilýi qajettigin tapsyrdy.
