Sáýir aıynyń alǵashqy kúni respýblıka mektepterinde synama sabaqtarynyń ótkeni belgili. Bilim jáne ǵylym mınıstrligi tarapynan sońǵy toqsanda qolǵa alynyp jatqan qashyqtyqtan oqytý barysyn keńinen túsindirgen bolatyn. Osy oraıda atalǵan mektep muǵalimderi «Qashyqtyqtan oqytý júıesi muǵalimder men oqýshylar úshin tıimdi me?» degen taqyrypta saýalnama júrgizip, tótenshe jaǵdaılar kezinde bilim salasy betpe-bet kelgen kúrdeli kezeńdi jumyla kóterýge kirisip ketti. Osy kúni №178 lıseıde qashyqtyqtan oqytý jóninde synama sabaqtar ótkizilip, pán muǵalimderi barlyq oqýshylarǵa túsindirme jumystaryn júrgizdi. Sabaqty onlaın rejıminde ótkizýge kundelik.kz, zoom, daryn.onlain bilim platformalary keńinen paıdalanyldy. Oqýshylar da onlaın rejıminde ótetin sabaqtarǵa baılanysty tapsyrmalardy jyldam ıgerip aldy.
Osy oraıda «Qashyqtyqtan oqytý tehnologııasy boıynsha oqý úrdisin uıymdastyrý jáne ony júzege asyrý mehanızmi» taqyrybynda ZOOM platformasynda online rejımde ótken №4 pedagogıkalyq keńeste mektep dırektory Qaıratbek Shadıev ujymdy «Lıseıde 2019-2020 oqý jylynyń IV toqsanynda qashyqtyqtan oqytýǵa kóshý týraly» buıryǵymen tanystyryp, qashyqtyqtan oqytýdy júzege asyrý boıynsha qadamdyq nusqaýlar berdi. Sonymen qatar, barlyq resýrstarǵa (ınternet, oqý - ádistemelik keshender, muǵalimder ázirlegen materıaldar) súıenip, oqý baǵdarlamalaryn júzege asyrýda júrgiziletin jumystar barysyna toqtaldy. Dırektordyń oqý isi jónindegi orynbasary K.Shajabaeva onlaın keńeste III toqsandaǵy bilim sapasynyń qorytyndysyna baılanysty (sandyq esep) salystyrmaly monıtorıng arqyly baıandama jasady. Matematıka pániniń muǵalimi B.Qasen muǵalimderge keri baılanys júrgizý joldary men kundelik.kz úı tapsyrmalaryn berýde nusqaýlyqtarmen tanystyrca, mektep psıhology Sh.Asılova qashyqtyqtan oqý úrdisin uıymdastyrýda pán muǵalimderine keńes berdi.
Lıseıdiń qazaq tili men ádebıeti pániniń oqytýshysy, «Abaı Qunanbaıuly» tósbelgisiniń ıegeri Balmıra Isabaeva qashyqtyqtan oqytýdyń paıdaly jaǵyna toqtaldy. Júıe barysynda tehnologııalardy tıimdi paıdalanýdyń mańyzdylyǵyn atap ótti. Mysaly, oqýshylardyń bir mezette onlaın júıesine yńǵaılanyp, ony tez ıgerip alýy jáne barlyq tıisti tehnıkalyq quraldar men programmalardy ýaqytyly paıdalanýy kóńilge qonymdy. Sondaı-aq, oqýshylardyń jańa júıege daǵdylanyp, biliktiligin arttyrýyna mol múmkindik bar.
Bul másele dırektordyń oqý isi jónindegi orynbasary Kúljan Shajabaeva jáne dırektordyń ǵylymı-ádistemelik beıindi oqytý jónindegi orynbasary Gýlnafıs Dáýletbaeva ótkizgen «Ádistemelik keńestiń kún tártibinde qarastyrylatyn máseleler» onlaın konferensııa barysynda jalǵasyn tapty. Onyń barysynda kafedra jetekshilikterimen birge ádistemelik keńestiń kún tártibinde qarastyrylatyn máseleler josparlanyp, ár kafedra muǵalimderiniń «start zoom» qosymshasy arqyly onlaın vıdeo sabaqqa daıyndyq jumystary qaraldy. Úlgi retinde synaq sabaq pen kafedra otyrystary josparlandy. Al úshinshi toqsan barysynda ótken fızıka-ınformatıka, jaratylystaný, qazaq tili men ádebıeti kafedralarynyń onkúndikterdi taldaý jumysy «Bilim berý sapasyn jetildirýdegi, oqýshylardyń fýnksıonaldyq saýattylyǵyn arttyrý» onlaın keńeste talqylanyp, kafedra jetekshileri taldaý barysynda ótkizilgen is-sharalardyń úzdik jáne tolyqtyratyn tustaryna qatysty usynystaryn jetkizdi. Sonymen qatar, sabaqtar men synyptan tys is-sharalardyń oqýshylardyń fýnksıonaldy saýattylyǵyn arttyrýdaǵy yqpaldy tusy erekshelendi. Kafedra jetekshileri muǵalimderdiń úzdik jetistikterin kórsete otyryp, tabysty muǵalim jumysynyń nátıjesin alǵa tartty. Qashyqtyqtan oqytý júıesin túsindirý jáne oqýshylardy oǵan beıimdeý maqsatynda mektep basshylyǵy ata-analarmen de jınalys ótkizip, onlaın rejımindegi oqytý júıesine oıdaǵydaı atsalysýǵa shaqyrdy.
ALMATY
