«О́zderińiz bilesizder, elimizde jarııalanǵan tótenshe jaǵdaıǵa baılanysty meshitte jamaǵatpen oqylatyn namazdarǵa ýaqytsha shekteý qoıdyq. Ár azamattyń ómiri men densaýlyǵy qymbat qundylyq bolǵandyqtan, juqpaly indettiń aldyn alý úshin osyndaı sheshim qabyldaýǵa májbúr boldyq. Árıne, bul – ýaqytsha synaq. Alaıda jamaǵat namazy úshin meshit esigi jabylǵanymen, saýap pen izgilik esikteri eshqashan jabylmaıdy. Qasıetti hadıs-sharıfte aıtylǵandaı, musylmannyń nıeti amalynan qaıyrly. Onlaın rejımde nasıhat tyńdap, úıden shyqpaı saýapty amaldarǵa ortaqtasýǵa bolady»,- dedi Bas múftı.
QMDB qasıetti ramazanda jamaǵattyń ıgiligi úshin mynandaı jobalardy iske asyrýdy josparlap otyr.
«Qazaqstan musylmandary dinı basqarmasynyń www.muftyat.kz saıtynan «Ramazan ensıklopedııasy» qosymsha paraqshasy qosylyp otyr. «Hıkmet TV» stýdııasy arqyly 30 kún oraza boıy bilikti ımamdarymyz ben ustazdarymyzdyń «Otyz kúnge – otyz ýaǵyz» atty onlaın joba dáristeri júrgiziledi. «Hıkmet TV» stýdııasy arqyly Ramazan aıynda kún saıyn Respýblıkalyq «Áziret Sultan» meshitiniń qabyrǵasynda kúnine bir saǵat arnaıy onlaın-hatym oqylyp, qasıetti Qadyr túninde Quran Hatym duǵasy jasalady. Sondaı-aq, muslim.kz ıstagram paraqshasy arqyly ımamdarmen bir tolqynda duǵa jasaýǵa nıettelgen jamaǵattyń ıgiligi úshin Ramazan aıynyń birinshi kúninen bastap, kúndelikti ár 15 mınýt saıyn Respýblıkalyq «Áziret Sultan» meshitiniń qabyrǵasynda «Batamen el kógerer» atty onlaın rejımde duǵa jasap, bataǵa qatysý rásimi uıymdastyrylatyn bolady»,- dedi Bas múftı.
Sondaı-aq tótenshe jaǵdaı kezinde pitir sadaqasy men zeketti onlaın berýdiń ońtaıly joly qarastyrylǵanyn atap ótti.
