Izbasar Ábıevke kenetten jedel járdem brıgadasyn shaqyrtýǵa týra kelgen. Aýa jetispeı demi qysylǵan, eki aıaǵy jáne ishi isip ketken ol, shuǵyl túrde oblystyq aýrýhananyń qabyldaý bólimine jetkiziledi.
Dárigerler 49 jastaǵy Aqtaý qalasynyń turǵynynda júre paıda bolǵan júrek aqaýy bar ekendigin anyqtady. Qos jarmaly qaqpaqshasynyń kemistiginiń tórtinshi deńgeıinen ókpe qysymynyń kóterilýinen júrek jetkiliksizdigi paıda bolǵan, budan naýqas ólip ketýi múmkin edi.
Mańǵystaý oblystyq aýrýhanasynyń kardıologııalyq ortalyǵy júrek-qan tamyrlary hırýrgııasy bólimshesiniń meńgerýshisi, biliktilik sanaty joǵary dáriger Ernur Ordabaevtyń aıtýynsha, naýqasta aldymen demikpe, odan soń búırek jáne baýyr jetkiliksizdigi paıda bolǵan. Tolyq medısınalyq tekserýden ótken soń bes saǵatqa sozylǵan ota jasaldy. Naýqas jan saqtaý bóliminen jaqynda ońaltýǵa bólimshesine kóshirildi.
-Kezinde oǵan ota jasaý qajettigi jóninde birneshe ret aıtylǵan. Alaıda ózi der kezinde qaralmaı júre bergen. Naýryz aıynyń sońynda ol aýyr jaǵdaıda aýrýhanaǵa jetkizildi. Shyny kerek oǵan qoıylǵan dıagnoz óte aýyr. Ota jasaý kezinde júrektiń qaqpaqshasyn bólshektep qaıta jınadyq. Biz naýqasty joǵaltyp alýǵa sál qaldyq, sebebi onyń jaǵdaıy óte aýyr boldy. Onyń tolyqtaı saýyǵyp ketýi múmkin, ol úshin barlyq dárigerlik qoıylatyn talaptarǵa baǵynýyna týra keledi, dep atap ótti Ernur Ahanuly.
Aldaǵy ýaqytta naýqas mindetti túrde dárigerlerdiń baqylaýynda bolmaq. Al jaǵdaıy qalypty deńgeıge túsýi úshin ýaqyt kerek. Izbasar Ábıev otadan soń nevrologııa jáne ońaltý bólimshesine aýdaryldy.
-Negizginen júregim 2016 jyldan beri aýyryp bastady. Kúni búginge deıin mán bermeı júre berdim, keıde shanshý bolatyn, ýaqyt óte ózdiginen jazylyp keter dep úmittendim. Jaqynda birden densaýlyǵym nasharlaı tústi, aıaq-qolym qalshyldap tynysym taryldy, shuǵyl jedel járdem shaqyrtýǵa týra keldi. Aýrýhanaǵa jatqyzdy, dárigerler kelip ota jasaý qajettigin aıtty, birden kelisim berdim. Barlyǵyna alǵys aıtamyn, ota oıdaǵydaı ótti, deıdi Izbasar Ábıev.
Qazir karantın, sol sebepti naýqasqa týysqandary jiberilmeıdi. Al Izbasar bolsa otbasymen tek telefon arqyly baılanysyp otyr. Osy jumada úıine jiberiledi.
