2tors.online onlaın repetıtorlyq servısi Qazaqstannyń bilim berý naryǵyndaǵy basty seriktesteriniń biri BTS Education kompanııasynyń jobasy bolyp tabylady.
Olımpıadaǵa elimizdiń túkpir-túkpirinen jalpy sany 928 muǵalim qatysýǵa ótinim túsirgen. Ustazdardyń bilim deńgeıin onlaın testileý arqyly anyqtaýǵa negizdelgen alǵashqy kezeńnen súringenderdiń qatary kóp bolǵanǵa uqsaıdy. Alǵashqy synaqtyń nátıjelerine sáıkes, Halyqaralyq mekteptiń matematıka páni muǵalimi Elaman Serik joǵary nátıje kórsetip, Qazaqstannyń úzdik 20 muǵalimi qatarynyn kóringen. Búginde ol avtomatty túrde ekinshi kezeńge joldama alyp, kelesi kezeńge daıyndyq ústinde.
– Onlaın olımpıada ótetindigi jóninde áriptesimnen bildim. Tirkeýden ótip, qatysyp kórýge bel býdym. Kúndelikti jumys qalpymnan oıymdy basqa arnaǵa buryp, tájirıbe jınamaq oıym boldy. Test tapsyrmalary esh qıyndyq týǵyzǵan joq. Biraq, testileý ýaqytynda tapsyrmalardy oryndaýǵa bir jarym saǵat ǵana ýaqyt berildi. Men dál sol ýaqytta balalarmen ózindik jumys oryndap otyrǵanmyn. Nátıjesinde, testileýdi jarty saǵatqa kesh bastap, keı suraqtardy jiberip alǵanym bar. Úzdik jıyrma muǵalimniń tizimine enip, ekinshi kezeńge ótkenime qýanyshtymyn. Qazirgi ýaqytta daıyndyǵymdy pysyqtaýdamyn, – deıdi jas maman.
Ekinshi kezeńde úzdik 20 muǵalim úsh kún ishinde beınesabaqtyń úlgisin túsirip, uıymdastyrýshylarǵa jiberýi tıis. Beıne sabaqtar saıtqa jarııalanyp, ortaq daýys berý júıesi jáne ádil qazy alqalarynyń baǵalaýy arqyly saralanatyn bolady.
Olımpıada qatysýshylaryna ádil baǵasyn berip, jeńimpazdardy anyqtaýshy qazylar alqasynyń qatarynda BTS Education kompanııasynyń basshysy, qoǵam belsendisi Saıasat Nurbek, IT kásipker Arman Súleımenov jáne bilim berý salasyndaǵy ózge de tájirıbeli mamandar bar.
Biz de óz tarapymyzdan Halyqaralyq mekteptiń matematıka páni muǵalimi Elaman Serikke shyn myqtylar bas qosqan bilim báıgesinde sáttilik tileımiz! Ekinshi kezeńnen oq bogıy oza shaýyp, jeńis tuǵyrynan kórinýine tilektespiz.
Esterińizge sala ketsek, Elaman Serik Nur-Sultan qalasyndaǵy fızıka-matematıka baǵytyndaǵy Nazarbaev Zııatkerlik mektebiniń, elimizdegi eń úzdik oqý orny Nazarbaev Ýnıversıtetiniń túlegi.
ALMATY
