«Stop-coronavirus!» baıqaýyn pandemııanyń aldyn alý jáne onyń saldaryn joıý boıynsha tıimdi sheshimderdi izdeý maqsatynda «Ǵylym qory» AQ uıymdastyrdy. Koronavırýspen kúres týraly usynystaryn ál-Farabı atyndaǵy QazUÝ ǵalymdary da joldady.
Baıqaý aǵymdaǵy jyldyń 13-15 sáýir aralyǵynda Feısbýk áleýmettik jelisi jáne BILIM PLUS bilim berý platformasynda onlaın-rejımde ótti.
Fınalǵa iriktelgen 39 jobanyń ishinde, qazylar alqasynyń sheshimi jáne halyqtyq onlaın-daýys berý nátıjeleri boıynsha, sondaı-aq, koronavırýstyq ınfeksııanyń taralýynyń aldyn alý jáne boldyrmaý boıynsha QazUÝ ǵalymdary usynǵan ázirlemeler joǵary baǵalarmen atap ótildi. www.kaznu.kz derekterine súıensek, qazylar alqasynyń nazaryna usynylǵan QazUÝ-dyń bıologııalyq ydyraıtyn materıaldan qoldy qorǵaý quraldaryn jasaý, vırýsqa qarsy preparat jasaý, dezınfeksııalyq jýý quraldaryn shyǵarý, jańa ımmýnostımýlıatorlardy alý, túımedaq syǵyndysy bar teri antıseptıgin óndirý boıynsha jobalary joǵary dárejede tıimdilikke ıe. Ári júzege asyrýǵa daıyn jobalar retinde Úkimettiń qaraýyna, sonymen birge qyzyǵýshylyq tanytqan ınvestorlarǵa usynylatyn bolady.
Professor B.K.Zaıadannyń basshylyǵymen, «Spirulina platensis sıanobakterııalarynyń bıomassasy jáne onyń paıdaly ósimdiktermen ár túrli kombınasııalary negizindegi koronavırýstan qorǵaný maqsatynda jańa ımmýnostımýlıatorlardy alý» jobasy, qazylar alqasynyń baǵalaý nátıjeleri boıynsha baıqaý jeńimpazdary qataryna kirdi jáne eń kóp 653 – daýys jınaı otyryp, «halyqtyq» TOP-jobalar tizimin basqardy. Jobanyń máni sıanobakterııalardyń bıomassasy jáne onyń paıdaly ósimdiktermen ártúrli kombınasııalary negizinde, koronavırýstan qorǵaný maqsatynda, antıbakterıaldy, antıvırýstyq, probıotıkalyq jáne antıoksıdanttyq qasıetteri bar jańa ımmýnostımýlıatorlardy alý tehnologııasyn ázirleý bolyp tabylady.
Baıqaý qorytyndysy boıynsha «Ǵylym qory» AQ múddeli taraptarmen birlesip, kelip túsken usynystardy jyljytý jáne iske asyrý boıynsha jumys júrgizedi.
ALMATY
