Senator Serik Bekturǵanov depýtattar óńirlerdegi medısınalyq mekemelerde oryn alǵan jaıttardy nazarda ustap otyrǵanyn atap ótti.
«Medısına qyzmetkerleri men aýrýhana ujymdarynyń atynan túsip jatqan shaǵymdar sanynyń azaımaýy bizdi alańdatyp otyr. Shıelenisti jaǵdaılardyń áli kúnge deıin sheshilmeýi salada burys jáıttardyń da bar ekenin kórsetedi. Dárigerlerdiń osy sátte tekten tek shaǵymdanbaıtyny belgili, óıtkeni olardyń qazirgi kezde jumystary bastan asady», - dedi ol.
Senator sondaı-aq tótenshe jaǵdaı kezinde memlekettik organdardyń da qaýyrt isterin aıta kelip, jumys barysynda asyǵys ári júıesiz sheshim qabyldanatynyna toqtaldy. Onyń ústine keıbir sheneýnikter áli de bolsa qaradúrsin is-qımyldan asa almaı otyr.
«Jaqynda ǵana bir óńirdiń medısınalyq qyzmetkerleri ózderine tıesili ústemaqyny ala almaýy múmkin ekendigin aıtyp shaǵymdandy. Sebebi olar karantınde otyr. Al oblystyq deńgeıdegi joǵary laýazymdy adam Densaýlyq saqtaý basqarmasyna máseleni qarap, ústemaqynyń talapqa saı tóleý týraly tapsyrma berilgenin aıtady. Bul degenimiz formalızmniń alǵashqy dárejesi. Sondyqtan, meniń oıymsha, bul jerde medısına mamandarynyń bastaryn qaterge tigip eńbek etip jatqanyn esepke ala otyryp, máseleni sol jerde qarap, naqty sheshim qabyldaý qajet», - dedi S.Bekturǵanov.
Depýtat sondaı-aq medısına mamandarynyń pandemııamen kúreste aldyńǵy shepte, táýlik boıy jumys istep júrgenin aıta kelip, olarda emosııalyq-psıhologııalyq kúızelis bolýy yqtımaldyǵyna da nazar aýdarý qajettigin atap ótti.
«Olardyń qandaı jaǵdaıda júrgenin túsinýimiz kerek, shaǵymdaryna qaraı tıisinshe áreket etý qajet. Sonymen qatar, medısınalyq mekemelerde atqarylýǵa tıisti barlyq alǵysharttar jasaldy ma, sony naqty túsine bilý kerek», - dedi ol.
S.Bekturǵanovtyń aıtýynsha, emdeý mekemelerinde koronavırýs indetiniń joǵary deńgeıde syrqattanýdyń ózindik sebepteri bar.
«Árıne, oryn alǵan árbir jaǵdaıǵa qatysty kináliler bar. Bireýler úıretpedi, bireýler isteı almady. Dárigerler koronavırýs indetiniń qaterin bile tura, karantınge jabylýdy nemese juqtyrý qaýpin ádeıi jasady deýge bolmaıdy. Qaı kezde de sebep-saldary bolady. Bir uly saıasatker «Árbir qateliktiń aty-jóni bar» degen eken. Sondyqtan bul jaıtqa kinálilerdi keıinirek, aıqaı-shý men abyr-sabyr basylyp, eldegi jaǵdaı tynyshtalǵan soń qarastyrý qajet. Al qazirgi ýaqytta osyndaı oqıǵalardy boldyrmaý sharalaryn qolǵa alý kerek. Qatelik qaıtalansa, demek, biz bir nárseni durys istemeı otyrmyz degen sóz. Al medısına qyzmetkerleriniń shaǵymy jalǵasýda», - dedi senator.
Senator óz kezeginde Densaýlyq saqtaý mınıstrligine, jergilikti jerdegi jedel shtab pen jergilikti atqarý organdaryna tek qana shaǵym túsken emdeý mekemeleri emes, barlyq medısınalyq uıymdarǵa qatysty naqty shuǵyl sheshimder qabyldaý qajettigin usyndy.
