Búgin, 22 sáýirde Almatyda 693 adamda koronavırýstyq ınfeksııa tabylsa, onyń ishinde 383 adam megapolıstegi medısına salasynyń ókilderi, al onyń ishinde 286 adam Ortalyq qalalyq klınıkalyq aýrýhananyń qyzmetkerelri bolyp tabylady.
Qalanyń jańadan taǵaıyndalǵan Bas sanıtar dárigeri medısına qyzmetkerleriniń jappaı vırýs juqtyrýyna baılanysty epıdemıologııalyq tekserýlerdiń jalǵasyp jatqanyn aıta kele, Ortalyq qalalyq klınıkalyq aýrýhanaǵa qatysty: «Bul jerde aýrýhananyń ınfeksııalyq aýrýlardy emdeýge ruqsaty bolmasa da, em júrgizgeni anyqtaldy. Eń birinshi juqtyrǵan adamdy da taptyq. Infeksııa aldymen dıagnostıkalyq bólimnen taraǵan dep tuspaldap otyrmyz. Eń birinshi aýyrǵan adamdar osy jaqtan shyqqan. Osy jerge KT, ÝZD jasaýǵa kelgen adamnan onyń qasynda júrgen medbıkege juqqan. Ol pasıenttiń otbasyndaǵy 13 adam túgel tekserildi. Biraq olardyń vırýs juqtyrǵany zerthanalyq turǵyda rastalmady», – dedi Jandarbek Bekshın.
Bas sanıtardyń sózine qaraǵanda, bul aýrýhanada koronavırýs juqtyrǵan naýqastar oqshaýlanǵan. Memlekettik mekemelerge habarlamastan qabyldaý bóliminde pnevmonııaǵa shaldyqqan 5 tósek orynnan artyq ızolıator ashylǵan.
«Osy qyzmetke arnaýly ruqsaty bolmasa da atalmysh aýrýhana ınfeksııalyq naýqastardy emdegen. Qabyldaý bóliminde naýqastardy oqshaýlaǵan. Beınekameradaǵy kadrlarǵa sensek, qyzmetkerler aýrýhananyń ishinde qorǵanys quraldarynsyz emin-erkin aralap júrgen. Bunyń barlyǵy jappaı juqtyrýǵa ákeledi. Qazir bólimderdiń barlyǵy oqshaýlandy. Endi osydan keıin juqtyrý kórsetkishi azaıady dep oılamyz», – dedi Jandarbek Bekshın.
ALMATY
