Mekemeniń Quqyq bóliminiń basshysy Ǵabıt Qusaıynov nesıe alý úshin barlyq qujatymen keldi. Alǵashqy kúni kelip keńes alyp ketken zańger, búgin qajetti nesıe úshin kepilge qoıatyn jyljymaıtyn múlikti qıyndyqsyz, kedergisiz, áp-sátte tirkedi.
«Bıznes úshin barlyq jumysty bir jerden bitirýge múmkindik beretin HQO-nyń ashylǵanyna qýanyp otyrmyz. Kompanııamyz turyp qalmaı, ári qaraı jumys isteýi úshin bul nesıeniń mańyzy zor edi. HQO mamandarynyń kómegimen qajetti kepil múlkin tirkedik. Alǵystan basqa aıtar joq» – deıdi Ǵabıt Táýkenbaıuly.
Esterińizge salsaq, Prezıdent janyndaǵy tótenshe jaǵdaıdy qamtamasyz etý jónindegi memlekettik komıssııanyń sheshimine sáıkes «Azamattarǵa arnalǵan úkimet» memlekettik korporasııasy» KEAQ Almaty qalasynda shaǵyn jáne orta bıznes sýbektilerine qyzmet kórsetý úshin Naýryzbaı aýdanyndaǵy HQO-ny ashqan bolatyn.
Bıznes ókilderine arnalǵan HKO jumysymen tanysqan arnaıy monıtorıngtik toptyń múshesi, qoǵam belsendisi Rafael Gasanov: «Karantın kezinde ekonomıkamyzǵa kóp zııan kelmes úshin, jáne kóktemgi egis qarsańynda kásipkerlerimiz ýaqytyn jiberip almas úshin bızneske arnalǵan HQO-nyń jumys isteýi úshin atsalysqan edik. Búginnen bastap Almaty qalasynda shaǵyn jáne orta bıznes ókilderine arnalyp HQO jumys isteı bastady. Búgin onyń jumysymen tanysyp kórdik. Talapqa saı, karantın talaptary da qarastyrylǵan», – dep atap ótti.
Ortalyqta kórsetiletin negizgi qyzmet túrleri – aýylsharýashylyq jáne agrobıznes salasy ókilderine arnalǵan jyljymaıtyn/jyljymaly múlik kepil shartyn memlekettik tirkeý, jyljymaıtyn/jyljymaly múlik kepil shartyna qosymsha kelisimdi memlekettik tirkeý qyzmetteri.
Zańdy tulǵalarǵa qyzmet kórsetetin HQO dúısenbi men juma aralyǵynda 09.00-den 16.00-ge deıin jumys isteıdi. Memlekettik qyzmetterdi sapaly jáne ýaqtyly kórsetý maqsatynda, nesıe berýde oń sheshim alǵan uıymdardyń tizimi boıynsha kestemen qyzmet kórsetiledi. Jáne kelýshilerge mindetti túrde betperdemen kirý talaby saqtalady.
Ortalyq «Shuǵyla» shaǵyn aýdany, 347/1 mekenjaıyndaǵy Naýryzbaı aýdandyq front-ofısiniń ǵımaratynda ornalasqan.
