Oblys boıynsha taýarlar men qyzmetterdiń sapasy men qaýipsizdigin baqylaý departamentiniń basshysy Berik Jarqynbekovtyń habarlaýynsha, eń kóp naýqas Qordaı aýdany men Taraz qalasynda anyqtalǵan. Infeksııalyq stasıonarda 44 naýqas emdelýde. Emdelgen 31 adam stasıonardan shyǵarylǵan. Olardyń barlyǵy qazir úı karantıninde medısınalyq baqylaýǵa alynǵan.
Oblys aýmaǵynda árbir koronavırýs jaǵdaıyna mindetti epıdemıologııalyq tekserý júrgiziledi. Derek boıynsha, ınfeksııa oshaqtarynda naýqastarmen baılanysta bolǵan 1029 tulǵa anyqtalǵan. Onyń ishinde 700 adam jaqyn jáne 329 adam yqtımal baılanysta bolǵandar. Barlyq jaqyn baılanysta bolǵan adamdar karantındik stasıonarda oqshaýlanǵan, al yqtımal baılanysqandar úı karantıninde turaqty medısınalyq baqylaýmen qamtamasyz etilgen. Al, oblystyq densaýlyq saqtaý basqarmasy basshysynyń orynbasary Hamıt Myrzaqasymovtyń aıtýynsha, koronavırýstyq ınfeksııamen kúresý úshin 770 medısına qyzmetkeri daıarlanǵan bolsa, onyń 386-sy qazirgi ýaqytta karantındegi naýqastarmen jumys istep jatyr eken. Eńbekaqydan basqa, olarǵa qosymsha tólemder tólenýde. Atap aıtsaq, naýryz aıynda 270 dárigerge, onyń ishinde 40 dáriger men 129 orta medısınalyq qyzmetkerge 40,1 mıllıon teńge ústemaqy tólengen. Naýryz aıynyń qorytyndysy boıynsha 8 medısınalyq uıym qarjy únemdeý esebinen 1319 qyzmetkerge jalpy somasy 88,9 mıllıon teńge syıaqy bergen. Medısınalyq qyzmetkerlerdiń turǵyn úı-turmystyq máseleleri de oń sheshimin tabýda.
Osy turǵyda 232 medısınalyq qyzmetker qonaqúıge ornalastyrylyp, olardy jumys ornyna tasymaldaý úshin kólik uıymdastyrylǵan. Jıyn sońynda Berdibek Saparbaev barlyq jerde aldyn alý sharalaryn kúsheıtý kerektigin tapsyrdy. Sonymen qatar, medısınalyq qyzmetkerlerdi jeke qorǵaný quraldarymen qamtamasyz etý, COVID-2019 boıynsha medısına, polısııa jáne koronavırýsqa qarsy is-sharalarǵa qatysatyn áskerı qyzmetkerlerdi testileýden ótkizý, olardy jeke qorǵaný quraldarymen qamtamasyz etý qajettigi de aıtyldy. Taraz qalasy men aýyldyq eldi mekenderde kóshelerdi, alańdardy jáne skverlerdi dezınfeksııalaýdy jalǵastyrý óte mańyzdy ekeni eskertildi. Sol sııaqty Berdibek Saparbaev Taraz qalasy men oblys aýdandarynda ornatylǵan blok-beketterdiń áli de tıimsiz jumys istep otyrǵandyǵyn alǵa tartty. Sondaı-aq, ákim jıynda karantın jaǵdaıynda adamdar azyq-túlik pen taǵamdardy úıge jetkizý qyzmetine kóbirek júgine bastaǵandyǵyn aıtty. Sońǵy ýaqytta Taraz qalasynda jetkizip berý qarqyny 8 myńnan 11,5 myńǵa deıin ósken.
Jambyl oblysy
