«Atameken» UKP ótken onlaın efırde memleket tarapynan nelikten osy kásiporyndardyń tirkelgeni týraly «Atameken» UKP Basqarma tóraǵasy A.Myrzahmetovke suraq qoıylyp, qoǵamnyń nazarazylyǵyn týǵyzǵan 361 kásiporynǵa qatysty tıisti vedomstvo naqty jaýap berý kerektigi aıtyldy.
«Bul tizim mekemeniń ishki jumysyna qatysty. Bul Úkimettiń sheshimi emes, mınıstrlik tarapynan bekitilmegen. Bul sarapshylardyń kompıýterinen shyqqan tizim. Oǵan «Atameken» UKP qatysy joq. Kásipkerler palatasy tek anketa toltyrý jaǵyna qol ushyn bergeni ras. Shaǵyn jáne orta kásiptegi kásiporyndarǵa kómektespeı, iri kásiporyndardy qoldaý múmkin emes» dep atap ótti A.Myrzahmetov. Onyń aıtýynsha, eldegi qarapaıym halyqtyń jáne áli de aıaǵynan turmaǵan shaǵyn jáne orta bıznestiń jaǵdaıyn qarastyrmaı, bul úlken tizimge qoldaý kórsetý múmkin emes. Tótenshe jaǵdaı jarııalanǵan kezde shaǵyn kásipkerlerge, fermerlerge túsken salmaqtyń qandaı ekeni belgili boldy. Sondyqtan da bul másele túpkilikti qaralatyn bolady.
