Ál-Farabı aýdanynyń aýmaǵynda salynyp jatqan balalar alańshasynyń qurylysymen tanysqan qala ákimi Murat Áıtenov sapaǵa aıryqsha mán berýdi tapsyrdy. Merdiger kompanııanyń ókilderine turǵyndardyń úıinde otyrǵan sátin utymdy paıdalanyp, qurylysty ýaqtyly ári sapaly aıaqtaýdy júktedi.
Bir qýanarlyǵy, qurylysqa qajetti zattardyń barlyǵy - otandyq. Tipti oıyn alańshasyna tóseletin rezeńke tósenishtiń ózi Shymkentte jasalady eken.
Ál-Farabı aýdanyndaǵy 672 kópqabatty turǵyn úı aldynda 400 aýla bar. Onyń basym bóligine balalar alańshasy salynǵan. 161-ine qajettilik týyndaǵan.
Osyǵan oraı, memlekettik jáne jekemenshik áriptestik aıasynda bıyl aýdan boıynsha 100 balalar alańshasy salynýda. Qalǵanynyń qujattary qaralýda. Buǵan qosa sport alańshalary da jóndelmek.
Aýdan ákimi Ǵabıt Máýlenqulovtyń aıtýynsha, aýdanda 15 gúlzar men alleıa salý jumysy da qarqyndy júrip jatyr.
Sapar barysynda qala ákimi A.Asqarov kóshesindegi 9-úıdiń qazirgi ahýalymen tanysty. Turǵyndar ótinishine qulaq asqan Murat Áıtenov saraptama júrgizip, qajettilik bolsa, kúrdeli jóndeý jumystaryn júrgizýdi jaýaptylarǵa júktedi.
