Parlament • 28 Sáýir, 2020

Zań jobasy azamattyq qorǵaýdyń memlekettik júıesin jetildirý maqsatyn kózdeıdi

269 ret kórsetildi

Parlament Senatynda senator Muhtar Qul-Muhammedtiń tóraǵalyq etýimen Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy boldy. Onda «Qazaqstan Respýblıkasynyń keıbir zańnamalyq aktilerine jumyldyrý daıyndyǵy men jumyldyrý máseleleri boıynsha ózgerister men tolyqtyrýlar engizý týraly» zań jobasy qaraldy, dep habarlady Senattyń baspasóz qyzmeti.

Zań jobasy azamattyq qorǵaýdyń memlekettik júıesin jetildirý maqsatyn kózdeıdi

Zań jobasy jumyldyrý daıyndyǵy men jumyldyrý júıesin, sondaı-aq memlekettik materıaldyq rezervti qalyptastyrý, saqtaý jáne paıdalaný bóliginde azamattyq qorǵaýdyń memlekettik júıesin jetildirý maqsatyn kózdeıdi.

Zań jobasy qabyldanǵanda jumyldyrý daıyndyǵy men jumyldyrý máselelerin quqyqtyq retteýde quqyqtyq olqylyqtardy joıýǵa, jeke jáne zańdy tulǵalardyń jumyldyrý daıyndyǵy salasyndaǵy mindetterin oryndamaǵany úshin jaýaptylyǵyn arttyrýǵa, jumyldyrý daıyndyǵy men jumyldyrý jónindegi is-sharalardy uıymdastyrýǵa jáne olardyń júrgizilýine turaqty baqylaý jasaýǵa, sondaı-aq memlekettik materıaldyq rezervtiń materıaldyq resýrstarynyń zapastaryn saqtaý jáne ýaqtyly jańartýǵa múmkindik beredi.

Senator Talǵat Musabaev qaralyp otyrǵan zań jobasy jumyldyrý daıyndyǵy men jumyldyrý júıelerin, sondaı-aq memlekettik materıaldyq rezervti jetildirýge baǵyttalǵanyn aıtty. «Zań jobasynda alǵash ret jumyldyrý daıyndyǵy salasyndaǵy buzýshylyqtar úshin ákimshilik jaýapkershilik engiziledi. Sonymen qatar, mundaǵy jumyldyrý daıyndyǵy men jumyldyrý salasyndaǵy memlekettik baqylaýdy engizý jańalyq bolyp tabylady. Bul zań jobasy óte mańyzdy, óıtkeni ony qabyldaý bizdiń elimizdiń jumyldyrý daıyndyǵyn memlekettiń áskerı qaýipsizdigi men qorǵanysyn qamtamasyz etetin deńgeıde qoldaýǵa múmkindik beredi», - dedi ol.

Komıtettiń keńeıtilgen otyrysynda sondaı-aq «Mamandandyrylǵan mekemelerdiń artyqshylyqtary men ımmýnıtetteri týraly konvensııany ratıfıkasııalaý týraly» zań jobasy qaraldy.

Qujatty ratıfıkasııalaýdaǵy maqsat - BUU men onyń túrli mamandandyrylǵan mekemeleriniń artyqshylyqtary men ımmýnıtetterin birizdilikke keltirý bolyp tabylady. Qazaqstan BUU-nyń 19 mamandandyrylǵan mekemesine múshe bolyp tabylady, bizdiń elimizde olardyń keıbiriniń (DDU, FAO, HQDB, HVQ, HQK, IýNESKO, HEU) ókildikteri bar.

Sondaı-aq, bul zańnama Qazaqstannyń aýmaǵynda mamandandyrylǵan mekemelerdiń qyzmeti úshin Konvensııada kórsetilgen erekshe jaǵdaılardy jasaý ratıfıkasııalaýdyń mindetin kózdeıdi. Atap aıtqanda, mundaı mekemeler, olardyń aktıvteri, kiristeri jáne basqa da menshigi barlyq tikeleı salyqtardan bosatylady, al laýazymdy adamdar BUU laýazymdy adamdaryna tıesili jeńildikterdi paıdalanady.

Zań jobasyn qabyldaýdan kútiletin nátıje – elimizde mamandandyrylǵan mekemelerdiń qyzmeti úshin qolaıly jaǵdaı jasaý, bul ekijaqty jáne kópjaqty yntymaqtastyqty keńeıtýge jáne tereńdetýge, sondaı-aq qyzmetti úılestirý men onyń tıimdiligin arttyrýǵa yqpalyn tıgizetin bolady.

Senator Tóleýbek Muqashevtyń aıtýynsha, Qazaqstan Konvensııany eskertpemen jáne málimdememen ratıfıkasııalaıtyn bolady. "Eskertýdiń qajettiligi Qazaqstan azamattarynyń osy erejelerge obektıvti túrde qol jetkize almaıtyndyǵyna baılanysty, óıtkeni olar sheteldikter nemese azamattyǵy joq adamdar bolyp tabylmaıdy, tıisinshe olarǵa osy adamdardyń óz azamattyǵy bar memlekettiń aýmaǵynda bolýyna baılanysty repatrıasııalaý rásimi qoldanylmaıdy. Málimdemege keler bolsaq, ol "kedendik alymdar" termınin qoldanýǵa baılanysty, ol Qazaqstan Respýblıkasynyń zańnamasyna sáıkes bosatý usynylatyn kedendik tólemderdiń barlyq túrleri dep túsiniledi",  dedi senator.

Zań jobalary Palatanyń qaraýyna jiberildi.