Sýretti túsirgen Samat MYRZALIEV
Jobanyń negizgi maqsaty – óńirde qarqyndy alma baqtarynyń kólemin odan ári ulǵaıtyp, olarǵa tamshylap sýarý júıesin engizý. Jalpy quny 2 mlrd 097,3 mln teńge bolatyn joba boıynsha otbasylyq alma baqtaryn qurýǵa arnalǵan jerdiń jalpy aýdany 117,61 gektar. Onyń 100 gektary qarqyndy alma baǵyn otyrǵyzýǵa, al 17,61 gektary ınfraqurylymǵa ıaǵnı, jol salýǵa, sorǵy jáne súzý stansalaryn ornatýǵa, tundyrǵysh-jınaqtaǵysh, uńǵyma úshin paıdalanylady.
Joba tolyq iske asqanda 50-den astam jańa jumys orny ashylady dep kútilýde. Qarqyndy alma baǵy pisip-jetilgennen soń jylyna 4 500 tonna ónim berýge qaýqarly. Otbasylyq baqtarda negizinen alma aǵashynyń «Gala», «Golden Delıshes», «Fıdjı», «Grennı Smıt» suryptary kóshet retinde otyrǵyzylady.
