Degenmen, Memleket basshysy qatań sanıtarlyq qaýipsizdikti saqtaı otyryp, elorda men Almaty qalalarynda keıbir nysandardyń jumysyn bastaýyna ruqsat berdi. Sondaı-aq Prezıdent qazirgideı kúrdeli kezde elimizdiń árbir azamatynyń nazardan tys qalmaıtynyn jáne memleket eshkimdi qıyndyqta qaldyrmaıtynyn da jetkizdi. Qasym-Jomart Toqaevtyń osy málimdemesine qatysty Senat depýtaty, Ekonomıkalyq saıasat, ınnovasııalyq damý jáne kásipkerlik turaqty komıtetiniń múshesi Álimjan Qurtaev óz oıyn bildirgen bolatyn.
«Elimizdegi ahýalǵa baılanysty tótenshe jaǵdaılar jónindegi komıssııanyń sheshimin negizge ala otyryp, el Prezıdenti Qasym-Jomart Toqaev karantın merzimin ústimizdegi jyldyń 11 mamyryna deıin sozdy. Aıtýly indet álem elderi men qosa Qazaqstandy da dúrbeleńge salǵaly biraz ýaqyt boldy. Koronavırýspen kúres 2 jolmen júrip kele jatyr. Onyń alǵashqysy – Qytaı bastaǵan biraz memleketter óz elderinde karantın jarııalap, júris-turysqa tyıym salyp, vırýstyń taralýyna jol bermeýde. Ekinshisi – ol Brazılııa, Iran, Belarýs sııaqty elder birinshi kezekte ekonomıkany saqtaımyz dep, karantın jarııalamaı basqa jolmen júrýde. Árıne barlyǵyna ýaqyt tóreshi», dedi Á.Qurtaev.
Senator Memleket basshysynyń el qaýipsizdigi úshin tótenshe jaǵdaı rejımin sozý týraly sheshimin qoldaıtynyn alǵa tartty.
«Memleket basshysy Qasym-Jomart Toqaev eldiń amandyǵy, halyqtyń densaýlyǵy bárinen joǵary dep elde karantın jarııalady. О́te durys sheshim degim keledi. Karantın jarııalanǵaly 45 kún bolypty, árıne osynshama ýaqyt boıy úıden shyqpaı otyrý ońaı emes. Degenmen, memleket tarapynan halyqqa kómek, qoldaýlar kórsetilip jatyr. Onyń ishinde turmysy tómen jáne tabysyn joǵaltqan otbasylarǵa qarjylaı jáne azyq-túlikteı kómek berilýde. Úkimet tarapynan bólingen 42 500 teńge áleýmettik qoldaý aqysyn 4 mln-nan astam adam alsa, odan bólek 1 mln-nan astam adam azyq-túlikteı járdem aldy. Sonymen qatar, 1 mln 600 myń adamǵa turǵyn úı sharýashylyq shyǵyndaryn óteý kómegi kórsetildi. El ekonomıkasynyń negizgi dińgegi bıznes, sol sebepti iri, orta jáne shaǵyn bıznesti qoldaýǵa Prezıdent Qasym-Jomart Toqaev 6 trıllıon teńge teńgege jýyq qarjy bólinip otyrǵanyn aıtty. Úkimetke osy bólinip otyrǵan qarjyny tıimdi paıdalaný joldaryn qaraýdy tapsyrdy», dedi ol.
Sondaı-aq, Senat depýtaty tótenshe jaǵdaıdan keıingi el ekonomıkasynyń damýyna alańdaýshylyq tanytanynyn bildirdi.
«El Prezıdenti basa nazar aýdarǵan taǵy bir dúnıe – ol karantınnen keıingi ómir. Osyǵan oraı ekonomıkanyń barlyq salasyna kómek, qoldaý qajet. Sebebi karantınniń saldarynan ekonomıka salalary quldyrap jatyr. Aldymen ol aýyl sharýashylyǵy salasyna aýqymdy kómek kerek. Odan keıin ekonomıkamyzdyń draıveri sanalatyn qurylys salasy. Q.Toqaev 27 sáýir kúngi málimdemesinde Úkimet pen Ulttyq bankke 11 mamyrǵa deıin ekonomıkany odan ári damytýdyń josparyn qurý tapsyrmasyn berdi. Memleket basshysynyń elimizde der kezinde tótenshe jaǵdaı jarııalap, tıisti sharalardy ýaqytyly qabyldanýynyń nátıjesinde Úkimet jaǵdaıdy óz baqylaýynda ustap otyr. Biz, Senat depýtattary óz kezegimizde naqty usynystarymyzdy ázirlep jatyrmyz. Degenmen, shyǵyn joq emes bar, osy indettiń saldarynan kóz jumǵan azamattarymyz da bar. Olardyń jaqyndarynyń qaıǵysyna ortaqpyz. Al aýyryp jatqan jandardyń tez saýyǵyp shyǵýyn tileımiz», dedi senator.
