Balasy jaıly
Jansaıa Nurtazınova sondaı ananyń biri. «Úsh japyraǵynyń ortanshysy Anary: – Mam, mama, aýrýhanaǵa aýyr halde túsken naýqasta koronavırýs barlyǵy anyqtalyp, bizdi, birneshe dáriger, medbıke men sanıtardy karantınge jaýyp tastady. Bizdiń bólimsheni aınala áskerıler qorshap tur... Eshkimdi kirgizbeıdi de, eshkimdi shyǵarmaıdy da, – degen balamnyń daýysyn estigende, qulaǵym shyńyldap, eki kózim qaraýytyp ketti», deıdi ol. Bul el bolyp dúrildete atap óter Naýryz qarsańy, 21-nen 22-sine qaraǵan tún bolatyn. Osy habardy alysymen tańdy kirpik ilmesten atyryp: «Jaratqan ıem, óz basyma ne berseń de kónemin, tek baýyrlarym men balalarym emes, endi maǵan tek kótere alar ǵana synaq berersiń, al muny men kótere almaımyn... Jalynamyn, jalbarynamyn tek bulaı emes», – dep Allaǵa eki qolyn jaıa, keýdesin jýǵan kóz jasymen qyzynyń aman-esen kelýin tilep, tańdy atyrǵan Jansaıanyń minájaty qabyl bolǵandaı. Arada eki jarym táýlik ótkende, saraptama qorytyndysynda vırýs joq bolyp, Anar 14 kún úı karantınine jiberiledi.
– 14 kún barlyq talapty saqtap, úıden attap shyqpadyq. Qorqynysh, kúdik, úreı, bári de boldy. Kútken kún jetip, vırýs tabylmady degen qorytyndy shyqty. Negizi Anar áli ıntern, biraq kúndiz sabaǵyn oqyp, keshke №1 aýrýhanynyń «Qabyldaý bólimindegi» jumysyna barady. Demalys kúnderi táýliktep kezekshilik atqarady.
О́tkende «basshylarymyz, jasy ulǵaıǵandar men kishkentaı balasy barlar, demalys alýlaryńyzǵa bolady dep aıtty» degeni esime túsip Anarǵa: – Aqysyz demalysqa ótinish berseńshi, qaıtesiń, bas qaýipsizdigiń kerek, kishkentaıyń bar, saǵan bolady, ruqsat beredi, áli tolyqqandy dáriger emes, ınternsiń ǵoı, – dedim. – Joq, olaı bolmaıdy, buryn 2-3 kúnde 1 ret táýliktik kezekshilikke shyǵýshy edik, qazir kún aınalyp táýlikke kezekshilikke shyǵyp jatyr, jumystaǵylarǵa qıyn, adam joq. Al dáriger ataýlynyń bári osy ınterndik joldy ótkeredi, ózińiz aıtýshy edińiz ǵoı, «elden alǵys al, halyqqa qyzmet qyl» dep, osyndaı qysyltaıań kúnderde qalaı jasyrynyp qalamyn? – deıdi. Qaıteıin, qyzym úshin ishim qaltyrap, qansha ýaıymdasam da balamnyń ǵumyr boıy bergen tárbıemniń jemisi ekenine qýandym», deıdi ana.
Anasy jaıly
Intern Anar Qýanyshbekovanyń anasy Jansaıa Nurtazınova – muǵalim. 30 jyldyq ustazdyq ǵumyry Jezqazǵanda ótken Jansaıanyń Nur-Sultan qalasyna qonys aýdarǵanyna áli jarty jyl tolǵan joq. Jezqazǵanda alǵashynda bastaýysh synyptarǵa sabaq berip, odan qazaq tili pániniń muǵalimi, mektep dırektorynyń oqý isi jónindegi orynbasary, dırektor bolyp, muǵalimdik joldyń barlyq satysynan ótken ol elordada da jany qalaıtyn mektepke keldi. «Qazir oqýshylaryma qashyqtan bilim berip, oqshaýlanǵan ómirde mamandyǵymnan ajyraǵanym joq. Qyzym: – Mama, sizdiń osynda kelgenińiz qandaı jaqsy boldy, áıtpese qazirgi kúni Jezqazǵanda otyrsańyz jaıaý jolǵa shyǵyp keter me edińiz dep, kúledi», deıdi ustaz.
– Myna aýrý qoǵamnyń biraz nársege kózin ashty dep oılaımyn. Buryn kimniń aqshasy kóp bolsa sol aqyldy kórinip, sonyń aıtqanyna júginetin halyq dáriger men muǵalimniń qadirin, jalpy erkin júrip turýdyń artyqshylyǵyn bilip, ne nársege de qaıta qarap, buryn qundy degenderiniń de qanshalyqty qadiri barlyǵyn eksheıtindeı boldy. Oılandyrdy. Qaı jerde qatelestik, qaı tusta bilmestik jasadyq, tabıǵattyń ózin aıalaı aldyq pa, adamdyq qasıetterdiń asyly ne, soǵan qııanat jasamadyq pa degizdi. Jalpy, ne bir jamandyqtyń da jaqsy sabaǵy barlyǵyn kórsetti.
Bir kúnde qashyqtan oqytýdy bastap ketý bárimizge de ońaı bolyp jatqan joq. Az ýaqyttyń ishinde shákirtińe baǵyt-baǵdar, tapsyrma berip úlgerip, odan olarmen keri baılanysqa shyǵyp, ıgergenderin tekserý kerek. Shákirtiń qarsy aldyńda otyryp, kózinen qanshalyqty uǵynǵanyn kóretin emes, vırtýaldy álem kómegimen oqytýdyń bul qıyndyǵynan ózge ár sabaqta aıtar ár sózińdi kádimgideı suryptaısyń. О́ıtkeni ol ári uǵynyqty, ári kóp sózdi bolmasyn deısiń de balamasyn izdeısiń, ár sabaqtyń josparyn qurasyń. Ata-ana sony túsinip, qoldaý kórsetse jaqsy, túsinbeıtinder de bar. Biraq munyń da durysy – ǵalamdyq jetistikterdi qoldanýǵa úıretip, qaı tusta jetimsizdik barlyǵyn kórsetti. Keı eldi mekenderde ınternettiń esep úshin qur qaǵazda barlyǵy anyqtaldy. Áıtpese «Qazaqstan túgel sıfrlandyq, ınternet qoljetimdi» degen aqparattyń qanshalyqty shyndyq ekenin bilip te bolmas edik. Oqshaýlanýdyń bul da bir jaqsy jaǵy boldy.
Ulttyq taǵamnyń qadiri
Osy kúni eldiń bári «durys tamaqtaný» degendi dáripteıdi. Durys ta shyǵar. Biraq adamnyń aǵzasy teginde jazylǵan, geninde bekigen taǵamnan erekshe nár alatyn bolsa kerek. Onyń ústine qazirgi juqpaly aýrýǵa tabıǵı et ónimderin tutynatyndardyń aǵzasynyń qarsy turý qabileti joǵary bolady degendi oqyp, qyzym karantınde jatqanda ımmýnıtetti kúsheıtý kerek dep kúnde qurtkóje, et, t.b. ulttyq asymyzdyń túrlerin daıyndap, qunarly, nárli taǵamdardy jıirek berdim. Qyzym da «Negizi, durys isteısiz, ókpe maldyń maıyn qajet etedi, al bul – vırýstyń kózdep keletin ornynyń biri, bizdiń mama biledi», dep kúledi.
«Keshe Anarym alǵashqy jumys kúnine qaıta shyǵyp, táýlikke ketti. Osy kúnder tezirek arta qalsynshy», deıdi Jansaıa Nurtazınova.
