Búginde aýdandaǵy aǵyn sý tapshylyǵyn joıyp, sýarmaly jerlerdiń tıimdiligin arttyrý jáne únemdeý baǵytynda «QazSýShar» RMK Túrkistan fılıaly tarapynan aýqymdy jobalar qolǵa alynǵan. «Jumyspen qamtýdyń Jol kartasy» memlekettik baǵdarlamasy aıasynda 50,741 shaqyrym kanaldardy mehanıkalyq tazalaýdan ótkizý josparlansa, uzyndyǵy 35,666 shaqyrym bolatyn K-34, K-25-18, K-21-06, K-28-31, K-34-12 kanaldary tolyq tazalaýdan ótken. Sonymen qatar, búginde K-25 kanalynyń tazalanýy tıis 22,7 shaqyrymynyń 5,5 shaqyrymy óskindi shópter men shógindi tunbalardan tolyqtaı tazalanǵan. 15 myń gektarda 2400 sharýa qojalyǵy ornalasqan atalmysh kanaldyń boıynda 4 tehnıka qyzý jumys isteýde. Sharýalardyń sońǵy 15 jylǵa jýyq ýaqyttan beri tazalaý kórmegen K-25 kanalynda tıisti jumys júrgizgen mekemege aıtar alǵysy sheksiz. Bul birinshi kezekte dıqandardyń ýaqtyly sý alýyna, únemdi paıdalanýyna úlken septigin tıgizeri sózsiz.
Aıta ketelik, búginde Jetisaı aýdanynda uzyndyǵy 3 myń shaqyrymǵa jýyq irili-usaqty 1068 kanal bar, 1556,9 shaqyrymǵa teń 780 dana sý júıeleri ornatylǵan.
