«Pandemııa bizdiń elimiz úshin ǵana emes, búkil álem úshin de naǵyz synaq boldy. Ol álemdik ekonomıkany eshqashan bolmaǵan kólemde qysqartyp, munaı naryǵynda baǵanyń tómendeýine, kásiporyndar men turǵyndar sharýashylyqtaryn asa qıyn jaǵdaıǵa alyp keldi. Munyń saldary ár adamnyń ómirine uzaq ýaqyt áser etetini anyq. Bul jaǵdaıdy durys baǵalaı bilýimiz kerek. Shyǵyndardy azaıtý qajet bolady. Bizder endi búgingi kúnniń shyndyǵymen jańasha ómir súrip júrmiz», - dedi D.Nazarbaeva.
Senat basshysy barlyq memlekettik organdarmen qatar depýtattardyń aldyna birqatar mindetter men problemalyq máseleler qoıylyp otyrǵanyn atap ótti.
«Búgingi jaǵdaıda ekonomıkanyń barlyq salalary men halyq memlekettiń qoldaýyna muqtaj. Álemdik ekonomıkadaǵy keleńsiz ahýal men resýrstardyń shekteýli bolýyn eskeretin bolsaq, ártúrli ssenarııler men boljamdardy qarastyryp, naqty múmkindikter men rezervterge baǵa berýimiz qajet. Úkimettiń is-qımyl josparynyń negizi erejelerin Parlamenttiń, óńirlerdiń, ekonomıka salalary men qoǵam ókilderiniń qatysýymen talqylaý qajet dep esepteımin. Bul máseleler búkil qoǵamdy tolǵandyrady», - dedi D.Nazarbaeva.
Senat basshysy bul rette búginde memlekettik saıasattyń basymdyqtarynyń arasynda azyq-túlik, sanıtarlyq-epıdemıologııalyq qaýipsizdik máselesi, sondaı-aq ımportty almastyrý birinshi orynda bolýy tıis dep sanaıdy. «Munaıdan túsetin tabystardyń tómendeýi eksport múmkindikterin aıtarlyqtaı qysqartady, ıaǵnı kóp nárseni biz ózimiz jasap úırený kerekpiz», dedi Tóraǵa.
D.Nazarbaeva agroónerkásip keshenin damytý strategııasyna erekshe nazar aýdardy.
«Jer jyrtyp, mal ósirip otyrǵan iri, orta jáne shaǵyn bıznes azyq-túlik qaýipsizdigin qamtamasyz etip keledi. Jyl basynda ótken parlamenttik tyńdaýda agroónerkásip sektoryna jasalǵan taldaý osy salada problemanyń kóp ekenin kórsetti. Burynǵy problemalarǵa endi tótenshe jaǵdaı kezindegiler qosyldy. Bul Agroónerkásip keshenin damytýdyń memlekettik baǵdarlamasyn qaıta qaraý kerek ekenine taǵy da kózimizdi jetkizip otyr. Búgingi kúnniń shyndyǵyn eskerip, muny birinshi kezekte atqarý qajet», - dep atap ótti Darıǵa Nazarbaeva.
D.Nazarbaeva Qazaqstannyń ońtústigindegi agrarshylar tap bolǵan ózekti máselelerge jeke toqtaldy. «Qyryqqabat ónimine baılanysty Túrkistan oblysynda oryn alǵan jaǵdaıǵa qarańyzdarshy. Búkil álem kóptegen elderde ashtyqtyń oryn alý yqtımaldyǵy joǵary ekenin talqylap jatqanda, biz jınalǵan ónimdermen ne isterimizdi bilmeı otyrmyz» - dedi ol.
Senat basshysynyń pikirinshe, bul jaǵdaıdy máslıhattar men tekserý komıssııalary qatań baqylaýǵa alý qajet. «Fermerlerdiń eńbegin zaıa ketirýge bizdiń quqyǵymyz joq. Olarǵa memlekettiń kómegi qajet, ony osy aıdyń tájirıbesi kórsetti. Kómekti ishki naryq qajettiligine, sondaı-aq qaıta óńdeý men eksport múmkindikterine qaraı kórsetý kerek», - dedi Senat Tóraǵasy.
D. Nazarbaeva depýtattardyń asa mańyzdy mindeti – ekonomıkany, shaǵyn jáne orta bıznesti, aýyl sharýashylyǵy men azamattardy qoldaýǵa bólingen, daǵdarysqa qarsy sharalardy iske asyrýǵa baǵyttalǵan qarjynyń jumsalýyna baqylaý jasaý dep sanaıdy.
Senat basshysy Prezıdent tapsyrmalarynyń oryndalýyna turaqty monıtorıng júrgizýdi, Úkimettiń daǵdarysqa qarsy sharalarynyń iske asyrylýyn joǵarǵy Palatanyń komıtetteriniń baǵyttary boıynsha, óńirlerden saılanǵan depýtattarǵa – óz óńirleri boıynsha baqylaýǵa alýdy tapsyrdy.
D.Nazarbaeva qazirgi tańda Parlamentke kelip túsken 2019 jylǵa arnalǵan respýblıkalyq bıýdjettiń atqarylýy týraly Úkimettiń esebi boıynsha jumystarǵa jeke toqtaldy. «Bıýdjettik josparlaý júıesin durys qurýdyń mańyzdylyǵyn eskere otyryp, biz Senat janynan bıýdjet zańnamasyn jetildirý jónindegi keńes qurdyq jáne ol belsendi jumys istep jatyr. Keńestiń kóptegen usynystaryn Qarjy jáne Ulttyq ekonomıka mınıstrlikteri jumys úshin qabyldady. Osy jumysty jalǵastyrý kerek», - dedi D.Nazarbaeva. Ol sondaı-aq Senat komıtetterine óz baǵyttary boıynsha esepti muqııat zerdelep, problemalar anyqtalǵan jaǵdaıda, olardy júıeli túrde sheshý joldaryn usynýdy tapsyrdy.
