Qostanaılyq kásipkerler endi kerekti keńester men qujattary úshin mekeme jaǵalap júgirmeıtin boldy. Qostanaı qalasyndaǵy bıznes ortalyǵynda kásipkerlerge qyzmet kórsetý ortalyǵy ashyldy. Onda «Damý» kásipkerlikti damytý qorynan bastap kásipker jumysyna qatysy bar, barlyq mekemeler ókilderi bolady. Olar kelýshilerdi memlekettik kómek baǵdarlamalary týraly aqparattarmen, qujattarmen qamtamasyz etedi. Keńesshiler men menedjerler bızneske baılanysty túıindi máseleniń sheshimin tabýyna keńes-kómegin aıamaıdy.
Qostanaılyq kásipkerler endi kerekti keńester men qujattary úshin mekeme jaǵalap júgirmeıtin boldy. Qostanaı qalasyndaǵy bıznes ortalyǵynda kásipkerlerge qyzmet kórsetý ortalyǵy ashyldy. Onda «Damý» kásipkerlikti damytý qorynan bastap kásipker jumysyna qatysy bar, barlyq mekemeler ókilderi bolady. Olar kelýshilerdi memlekettik kómek baǵdarlamalary týraly aqparattarmen, qujattarmen qamtamasyz etedi. Keńesshiler men menedjerler bızneske baılanysty túıindi máseleniń sheshimin tabýyna keńes-kómegin aıamaıdy.
– Kásipkerlikke baılanysty barlyq aqparattar men qujattar «bir tereze» ustanymymen jasalǵan osy ortalyqtan tabylady. Kásipkerler ýaqytyn únemdeý úshin osy ortalyqqa barlyq memlekettik organdar, konsaltıngtik kompanııalar, ekinshi dárejeli bankter, qarjy ınstıtýttary ornalastyryldy. Bızneske nıet etken kisi ortalyq menedjerlerinen bıznesti qalaı bastaýdan ony qalaı saýatty júrgizý kerektigine deıin keńes alýyna bolady, – deıdi oblys ákiminiń orynbasary Murat Dáribaev.
Bul kásipkerlerge kómek beretin respýblıkadaǵy segizinshi ortalyq bolyp sanalady. Munda kásipkerlerdi belgili kúnderi Qostanaı oblysy boıynsha salyq departamenti jáne qalalyq salyq basqarmasy ókilderi de qabyldaıtyn bolady.
Kásipkerlerge qyzmet kórsetý ortalyǵy olardy qoldaýdyń úsh satyly qurylymynyń sońǵysy bolyp tabylady. Osy qurylymǵa munymen qosa kásipkerlikti qoldaýdyń mobıldik jáne monoqalalardaǵy kásipkerlerdi qoldaý ortalyqtary kiredi. Jańa ashylyp otyrǵan ortalyq kásipkerlerdi bıznes isin saýatty júrgizýge úıretýmen de aınalysady. «Damý» qoryndaǵy «bıznes-keńesshi» baǵdarlamasy jumys istegeli 41 myń adam bıznes isi jóninde tegin oqydy. Ekonomıkanyń san-salasyndaǵy bıznes negizderinen bilim beretin semınarlarǵa qatysqandar biliktiligin arttyrady. Ortalyqta kásipkerler býhgalterlik, zańgerlik, marketıngtik qyzmetterdi de paıdalana alady.
Názıra JÁRIMBETOVA,
«Egemen Qazaqstan».
QOSTANAI.
