О́zbekstan respýblıkasynyń Sý sharýashylyǵy mınıstri Sh. Hamraevtyń bergen resmı málimetine sáıkes, qazirgi tańda «Sordaba» qoımasynan sý jiberý jumystary tolyq toqtatylǵan. Degenmen túnimen aqqan sarqyrama sý «SGK» kanalyna jınaldy. Atalǵan kanaldyń sý jiberý qýattylyǵy sekýndyna 120 tekshe metr. Biraq kanalǵa túnimen sekýndyna 180 tekshe metr sý aǵyp kelgen. Osyny eskergen oblystyq tótenshe jaǵdaı jónindegi tıisti qyzmetter Maqtaaral aýdanyndaǵy 4 eldi mekennen 5400 adamdy evakýasııalaýǵa májbúr boldy. Birqatar turǵyndar óz kólikterimen týǵan - týystaryna barýdy qalasa, qalǵandary evakýasııa barysynda Atakent kentindegi mektepterge jaıǵastyryldy. Osy jaǵdaıǵa qatysty málimdeme jasaǵan oblys ákimi О́mirzaq Shókeev evakýasııalanǵan turǵyndar byltyrǵy Arystyń tájirıbesine sáıkes tıisti medısınalyq qyzmet, azyq-túlik sekildi barlyq zattarmen qamtamasyz etiletinin aıtty.
«Qazir endi О́zbekstan mınıstriniń resmı málimdemesine sáıkes, sý basqan óńirdiń barlyǵyn qaıtadan aralap, kórip shyǵamyz. Sý basý qaýipteri bolmaıtyn jaǵdaıda ondaǵy barlyq turǵyn úıler polısııamen qorǵalatyn bolady. Ázirge turǵyndardyń maldary qaýipti aımaqtan túgel shyǵaryldy. Eshqandaı shyǵyn joq. Endi turǵyndardyń úıleri, múlikteriniń bári kúzetiletin bolady. Eger de sýdyń deńgeıi áli de kóteriletin bolsa, Maqtaaral aýdanyndaǵy taǵy da qosymsha 4 eldi mekendi evakýasııalaıtyn bolamyz. Ol Nurlyjol, Fırdaýsı, Jantaqsaı, Jaılybaev eldi mekenderi. Atalǵan ár eldi mekende tótenshe jaǵdaıdy turaqtandyrý úshin jaqyn aradaǵy aýdandardyń kúshteri jumyldyryldy. Aıtalyq, Nurlyjol eldi mekenine Shardara aýdanynyń ákimdigi, Ferdaýsı, Jantaqsaı aýyldaryna Keles aýdany, T. Jaılybaev aýylyna Saryaǵash aýdany jaýapty bolyp bekitildi. Sondyqtan meniń aıtatynym, turǵyndarǵa dúrligip, kóshege shyǵyp, dúrbeleń jasap, jolǵa shyǵýdyń qajeti joq. Barlyǵy uıymdasqan túrde rettelip, óz qalpyna keledi.
Bul jergilikti masshtabtaǵy tótenshe jaǵdaı. Sondyqtan bul jerde Arystaǵy tájirıbege saı algorıtmde jumys isteıtin bolamyz. Bári uıymdasqan túrde retteledi, qalpyna keledi. Bul tótenshe jaǵdaıdy ıgerýge oblystyń tolyq múmkinshiligi bar», dedi О́mirzaq Shókeev.
