Ásirese, Jańajol, Eńbekshi aýyl okrýgterine qarasty Jeńis, Jańaturmys, Jantaqsaı aýyldaryndaǵy alqaptar kóptep zardap shekken. Sý astynda qalǵan egistik alqaptyń 85 paıyzy maqta, qalǵany jońyshqa men júgerige tıesili. Túgendeý jumystarymen oblystyq Aýyl sharýashylyǵy basqarmasynyń basshysy Nurbek Badyraqov bastaǵan arnaıy jumysshy toby aınalysýda. «Qazirgi tańda 95 mamanymyz sý astynda qalǵan egistik alqaptary men mal shyǵyndaryn eseptep, túgendeý jumystaryn júrgizýde. Shyǵyndardy tolyq esepteýge ázirge múmkindik az bolyp tur. Desek te, turǵyndar bergen málimetterdi aýdandyq aýyl sharýashylyǵy bólimimen birlese otyryp, zerdeleýdemiz. Sý tasqyny basylǵan soń aýyldardy aralap, shyǵyn kólemin naqty anyqtaıtyn bolamyz», dedi Myrzakent kentindegi shtabtyń baspasóz ortalyǵynda basqarma basshysynyń orynbasary Turǵanbek Ospanov.
Maqtaaral aýdanynda aldaǵy ýaqytta sý basý qaýpi bar aýyldarda maldy qaýipsiz jerge jetkizý jumystary jalǵasýda. Qazirdiń ózinde sý tasqyny oryn alǵan 7 eldi mekennen ıaǵnı, Jeńis, Jańaturmys, Jantaqsaı, Ferdoýsı, Eńbekshi, Nurlytań, О́rgebas aýyldarynan 3115 iri qara, 1101 jylqy, 585 qoı, 34 túıe kóshirilgen. Al sýǵa ketip ólgen mal sany ázirge belgisiz bolyp otyr. Bul jumystarǵa tasqyn sýdyń áli de bolsa toqtamaı turǵany qolbaılaý bolýda.
