Shıra Frenkel,
Maık Aızek
Jalpy, Facebook keıingi eki jylda qaýipsizdikpen aınalysatyn toptaryn tarata bastady. Kompanııanyń habarlaýynsha, Facebook qaýipsizdikti qamtamasyz etýge qomaqty qarjy bólip keledi. Al qyzmetkerlerdi qysqartyp, toptardy qaıta qarastyrý kompanııa metodologııasyn jańǵyrtýǵa, kıbershabýylǵa tosqaýyl bolýǵa baǵyttalǵan.
Facebook ókiliniń sózine súıensek, kompanııa basshylyǵy endigi jumys qaterlerdi avtomatty túrde anyqtaýǵa basymdyq beredi. Sondaı-aq qaýipsizdikti aldyn ala eskertýge arnalǵan arnaıy top qurmaq. Bul ózgerister jumys toptarynyń jumysyn jeńildetip, jańasha mindetter júkteıdi.
Keıingi jyldary Facebook-tiń qaýipsizdikti qamtamasyz etýge arnalǵan sharalary jıi synǵa ushyrap júr. Máselen, 2016 jyly Reseı tarapy áleýmettik jeli arqyly AQSh-tyń prezıdenttik saılaýyna yqpal etti delinedi. Al 2018 jyly kompanııa qaýipsizdik júıesinde aqaý ketkenin anyqtady. Osy kemshiliktiń saldarynan mıllıondaǵan adamnyń jeke derekteri qoldy bolyp kelgen.
Buryn qaýipsizdikti qamtamasyz etý qyzmeti Aleks Stamos basqaratyn topqa júkteletin. Ol aqparattyq qaýipsizdik bóliminiń dırektory. A.Stamos 2018 jyly kompanııadan ketken soń, bólim taratyldy. Qyzmetkerler basqa bólimderge aýysty. Sodan beri aqparattyq qaýipsizdik bóliminiń basshysy laýazymy joıyldy.
Kompanııa qyzmetkerleriniń sózine súıensek, Facebook qyzmetteriniń qaýipsizdigin nyǵaıtý maqsatynda jańa qadamdar qarastyrý ústinde. Osy jumys aıasynda qaýipsizdikti qamtamasyz etýge baǵyttalǵan baǵdarlamalar jazýǵa arnaıy qyzmetkerler alynbaq. Avtomattandyrý ádisin qoldaıtyn menedjerlerdiń aıtýynsha, osy baǵyttaǵy sharalardy jasandy ıntellektke júkteý arqyly qyzmetkerlerge túsetin júkteme jeńildemek.
Kompanııa LinkedIn jelisindegi paraqshasynda qaýipsizdik qaterlerimen kúresetin júıe jasaýǵa qajetti qyzmetkerlerdi izdeıtinin habarlady. Al ózgerister saldarynan jumyssyz qalǵan qyzmetkerler basqa jumys tabý qıynǵa soǵatynyn aıtyp otyr. О́ıtkeni olar negizinen bir ǵana salaǵa beıimdelgen.
Daıyndaǵan
Abaı ASANKELDIULY,
«Egemen Qazaqstan»
