Bul sheshim qyrǵyz jáne tájik taraptarynyń Qazaqstanǵa resmı ótinishterine baılanysty qabyldanǵan bolatyn. Bul týraly Prezıdent Q.Toqaev 10 sáýirde ótken Túrkitildes memleketteri yntymaqtastyq keńesiniń tótenshe beınesammıtinde COVID-19 pandemııasy jaǵdaıynda elimiz úshin baýyrlas memleketterdiń azamattaryna barynsha qolǵabys jasaýdyń mańyzdylyǵyn aıta kele, azyq-túlik qaýipsizdigin qamtamasyz etý úshin Qyrǵyzstan men Tájikstanǵa qoldaý kórsetiletinin (ár elge 5 myń tonnadan un beriledi) aıtqan bolatyn.
О́tken aptada Qyrǵyz temirjolynyń Bishkek qalasyndaǵy júkterdi qabyl alatyn beketine Qazaqstannan 12 vagonǵa artylǵan 800 tonna un keldi. Bul unnyń birinshi partııasy, qalǵan 4 200 tonna un kezeń-kezeńimen jetkizilmek.
Qazaqstannyń Qyrǵyz Respýblıkasyndaǵy elshiliginiń ókilderi qatysqan júkterdi ótkerip berý rásiminde Qyrǵyzstannyń aýyl sharýashylyǵy, azyq-túlik kásiporny jáne melıorasııa mınıstri Erkınbek Chodýev qyrǵyz tarapy Qazaqstan Respýblıkasynyń Úkimeti kórsetip otyrǵan járdemdi joǵary baǵalaıtynyn aıtyp, qoldaý kórsetkeni úshin týysqan Qazaq eline tereń rızashylyǵyn bildirdi.
Aıta keteıik, Qyrǵyzstanǵa ótken aıda О́zbekstan men Reseı de qoldaý kórsetken edi. Atap aıtqanda, О́zbekstan gýmanıtarlyq járdem retinde 1000 tonna un jáne indetten qorǵanýǵa qajetti medısınalyq buıymdar alýǵa qarajat bergen. Al endi, Qyrǵyz Respýblıkasynyń Úkimetine qarasty Memlekettik materıaldyq rezerv qory Reseı Federasııasynyń azyq-túlik korporasııasynan 33 myń tonna bıdaıdy satyp alý jóninde kelisimge qol qoıǵan. Búgingi kúnde munyń 1800 tonnasy Qyrǵyzstanǵa jetkizildi.
Al endi, Qazaqstannyń járdemi ózgeshe bolyp tur. Elbasy Nursultan Nazarbaevtyń «qazaq pen qyrǵyz álemdegi bir-birine eń jaqyn halyq» degen sózi esimizde. Qazaq eli bul jaqyndyqty qıynshylyq zaman basqa túskende taǵy da dáleldep otyr. Taratyp aıtqanda, 5000 tonna un – 100 myń qap. Demek, járdemge muqtaj qyrǵyzstandyq 100 myń otbasy bir qaptan tegin un alady.
Nazarbek BAIJIGITOV,
arnaıy «Egemen Qazaqstan» úshin
Qyrǵyz Respýblıkasy,
Bishkek qalasy
