Jınaq depozıtter merzimine qaramastan eń tabysty salymdar bolyp qala bermek

Merzimsiz jáne qysqa merzimdi depozıtter boı       ynsha eń joǵary syıaqy mólsherlemeleri depozıtterdiń osy tobyna qatysty mólsherlemelerdiń birqalypty tómendeýi aıasynda qaıta qaraldy.

Osynyń nátıjesinde teńgedegi merzimsiz depozıtter boıynsha eń joǵary mólsherleme maýsym aıynda 11,0 paıyzdy quraıdy. 3 jáne 6 aıǵa arnalǵan merzimdi depozıtterdiń tolyqtyrýǵa bolatyn túri boıynsha – 11%, al tolyqtyrylmaıtyn túri – 11,5%. Sondaı-aq osy merzimge arnalǵan jınaq depozıtterdiń tolyqtyrylatyn túri – 12,0%, tolyqtyrylmaıtyn túri – 12,5%.

12 jáne 24 aıǵa shaqtalǵan uzaq merzimdi salymdar boıynsha usynylatyn eń joǵary mólsherlemeler tómen qaraı da joǵary qaraı da ózgerdi. Bul salymdar boıynsha paıyzdar ortasha ólshengen syıaqy mólsherlemesi negizinde esepteledi.  

Merzimi 12 aı, tolyqtyrý múmkindigi bar jınaq depozıtter boıynsha eń joǵary mólsherlemeler maýsym aıynda 12,8 paıyzǵa deıin tómendeıdi. Al tolyqtyrý múmkindigi bar, 12 jáne 24 aıǵa salynatyn merzimdi depozıtter boıynsha mólsherlemeler sáıkesinshe 10,5% jáne 10,3%-ǵa deıin, tolyqtyrý múmkindigi joq túrleri boıynsha – 11,2% jáne 11,1%-ǵa deıin tómendeıdi.

Tolyqtyrý múmkindigi bar uzaq merzimdi salymdar boıynsha mólsherlemelerdiń tómendeýi  tolyqtyrý quqyǵynyń qunyn qaıta qaraýǵa baılanysty oryn alyp otyr. QDKBQ ony Ulttyq Banktiń bazalyq mólsherlemesiniń ózgergendigin jáne sonyń nátıjesinde memlekettik baǵaly qaǵazdardyń tabystylyq aýytqymasynda oryn alǵan ózgeristerdi nazarǵa ala otyryp, Ádistemege[1] sáıkes ózgertti. 

Tolyqtyrý quqyǵy bar, merzimi 24 aı bolatyn jınaq depozıtter boıynsha usynylatyn eń joǵary mólsherlemeler – 12,9%-ǵa deıin, al tolyqtyrý quqyǵy joq, merzimi bir jáne eki jylǵa arnalǵan túri boıynsha – 14,9%-ǵa deıin joǵarylaıdy.

Jalpy maýsym aıynda barlyq merzimge arnalǵan jınaq depozıtter bank klıentteri úshin óziniń tartymdylyǵyn saqtaıdy jáne basqa kez kelgen salymǵa qaraǵanda (12%-dan 14,9%-ǵa deıin) úlken tabys  ákeledi.

ALMATY