Joba maqsaty — tarıhı estelikti, urpaqtar sabaqtastyǵyn saqtaý, jastardyń óz áýletiniń, halqynyń jáne eliniń tarıhyn zerdeleýge qyzyǵýshylyn oıatyp, yqylasyn arttyrý, olardyń alǵys pen qurmet sezimin eljandylyq pen maqtanysh sezimine ulastyrý.
Bul joba eki uly birdeı maıdanǵa ketip, oralmaǵan 1900 jylǵy Baqytjan Eńsebaevanyń ómir tarıhynan bastaý aldy.
«Baqytjan Eńsebaeva 88 jyl ǵumyr keshken eken. О́le-ólgenshe ol qos bozdaǵyn kórýden kúderin úzbepti. Soǵys bastalǵan shaqta nebári 15-te bolǵan úlkeni maıdanǵa attanǵansha asyq bolypty. Qaıta-qaıta aryz, ótinish jazypty, biraq, tek 1943 jyly, 18-ge tolǵanda ǵana soǵysqa jóneltilip, bir aıdan soń-aq habarsyz ketipti. Ekinshi uly da soǵysta qaza taýypty», dep áńgimelep berdi «Atamnyn amanaty» QB basqarmasynyń Tóraǵasy Murat Moldaǵalıev.
Moldaǵalıevtiń aıtýynsha, Baqytjan Eńsebaeva Qamysty aýdanyna qarasty Urqash kentiniń irgesindegi zıratqa jerlengen. Qazir ol eldi mekende azyn-aýlaq shańyraq qana turyp jatyr. Osy ótken jyldary Baqytjan Eńsebaevanyń molasy qaraýsyz qalypty, óıtkeni, kóz qyryn salatyn adam qalmapty.
«Biz Qostanaı oblysynyń ákimshiligine ótinish bildirdik. Ákimniń áleýmettik máseleler jónindegi orynbasary Júndibaev Marat Kúnisbaıulynyń, Qamysty aýdanynyń ákimi Bekmuhamedov Ǵazız Erbolatulynyń qoldaýymen marqumnyń beıitin qalpyna keltirip, abattandyrý jumystary júrgizildi. Biz ári qaraı da osyndaı tarıhı derekterdi jınap, bálkim, múmkindik bolsa, eske alý keshterin ótkizýdi, sondaı-aq, uldary/jarlary/ákeleri maıdanǵa attanyp, habar-osharsyz ketken áıelder týraly qujatty fılmder serııasyn túsirýdi josparlap otyrmyz» – dep oıyn ortaǵa saldy Murat Moldaǵalıev.
«Atamnyn amanaty» QB barsha qazaqstandyqtardy osy jobaǵa atsalysyp, Uly Otan soǵysyna qatysqan ata-ájeleri men týǵan-týystary jaıly tarıhı oqıǵalar men estelikterin ortaǵa salýǵa shaqyrady.
