Jeńisti jaqyndatqan ardagerlerdiń sany jyl ótken saıyn seldirep keledi. Búgingi tańda Túrkistan oblysynda 40 Uly Otan soǵysynyń ardageri, 8 myńǵa jýyq tyl ardageri turady. Búgingi urpaq Otan úshin, keleshek urpaq úshin qasyq qanyn aıamaǵan atalarymyz ben ájelerimizdiń, ákelerimiz ben analarymyzdyń asqaq rýhyna bas ıip, taǵzym etedi. Osy oraıda Qazaqstan Jýrnalıster odaǵy Túrkistan oblysy fılıalynyń tóraǵasy, «Egemen Qazaqstan» gazetiniń menshikti tilshisi Ǵalymjan Elshibaı bastaǵan jýrnalıster toby Maqtaaral aýdany Myrzakent eldi mekeninde turatyn soǵys ardageri Saıtmýrat Kýzjanovtyń úıine arnaıy baryp qaıtty. Jýrnalıster soǵys ardagerine «Egemen Qazaqstan» respýblıkalyq gazeti» aksıonerlik qoǵamy Basqarma tóraǵasy Darhan Qydyráliniń jáne Qazaqstan Jýrnalıster odaǵynyń tóraǵasy Seıitqazy Mataevtyń quttyqtaýyn jetkizip, syı-sııapat tapsyrdy. Búginde 96 jasqa kelgen Saıtmýrat Kýzjanov aqsaqal maıdanǵa 18 jasynda 1944 jyly attanypty. Semeı qalasyndaǵy 309 atqyshtar polkynda daıyndyqtan ótken jaýynger II Ýkraına maıdanynda jaýǵa qarsy soǵysqan. Vengrııany azat etýge qatysqan. Erligi elenip «Otan soǵysy» ordenimen, birneshe medaldarmen marapattalǵan. Soǵystan keıingi jyldary aýyl sharýashylyǵynda eńbek etip, 1986 jyldyń aqpan aıynda zeınetkerlikke shyǵypty. Bes ul-qyz ósirip, 15 nemere, 10 shóbere, 2 shópshek súıgen aqsaqal zamannyń tynyshtyǵyn, eldiń amandyǵyn qalaıdy. Búginde memleket tarapynan jasalynyp jatqan múmkindikter men qamqorlyqtyń arqasynda ul-qyzdarynan taraǵan urpaqtarynyń bolashaǵy jarqyn bolatynyna senimdi. Sondaı-aq Saıtmýrat aqsaqal keshegi sý basqan aýyldardyń jaǵdaıyna alańdaýly ekenin de aıtty.
Iá, Maqtaaral aýdanyndaǵy sý basqan aýyldardaǵy ahýal búginde el nazarynda. Memleket tarapynan, elimizdiń barlyq óńirinen, bıznesmender men jomart júrekti azamattardan jan-jaqty qoldaý kórsetilýde. Osy oraıda aýdannan shynaıy aqparat taratyp otyrǵan buqaralyq aqparat quraldarynyń ókilderi de ıgi isten tys qalmady. Qazaqstan Jýrnalıster odaǵynyń oblystyq fılıaly bastamashy bolyp jýrnalıster sý basqan eldi meken turǵyndaryna 600 myń teńgege jýyq qarjy kóleminde kómek kórsetti. Maqtaaral aýdanynda jaǵdaıǵa tolyq qanyqqan respýblıkalyq, oblystyq buqaralyq aqparat quraldarynyń ókilderi Jańa turmys aýylynyń turǵyndary ornalasqan T.Áýbákirov atyndaǵy mektepte boldy. Bul evakýasııalyq orynda 300-deı turǵynǵa barlyq jaǵdaı jasalynǵan. Jýrnalıster turǵyndarmen áńgimelesip, ahýalyn bildi, arnaıy alyp kelgen qoı qurbandyqqa shalynyp aqsaqaldar aq batasyn berdi. Al Q.Sátpaev atyndaǵy mektepte qashyqtan oqyp, bilimin jalǵastyryp jatqan oqýshylarǵa jýrnalıster zamanaýı teledıdar tartý etti. Sondaı-aq jergilikti jerdegi áriptesterdiń jaǵdaıy da nazardan tys qalmady. О́kinishke qaraı, Maqtaaral aýdan ákiminiń baspasóz hatshysy Dinmuhammed Aıazbekovtiń О́rgebas aýylyndaǵy úıi sýda qalǵan bolatyn. Osyndaı qıyn sátte jýrnalıster Dinmuhammedke qarjylaı áriptestik kómek kórsetti.
Sondaı-aq jýrnalıster toby aýdandaǵy sý basqan aýyldarda bolyp, búgingi tańda atqarylyp jatqan jumystardy kórdi. Tótenshe jaǵdaı shtabynyń ókilderinen tolyqqandy maǵlumattar aldy.
