«Atam Kıizbaı Almaty oblysy burynǵy Gvardeısk aýdany Malaısary stansııasynda 1898 jyly týylǵan. 1941 jyly fashızmdik zulmat soǵys bastalǵannan keıin óz elin qorǵaýǵa bel býady. Ol kezde atamnyń jasy 43-te eken. Elge tóngen qaýipti oılaǵan ol, urpaǵynyń beıbit ómiri úshin Gvardeısk aýdanyndaǵy áskerı komıssarıatqa óz erkimen baryp, maıdanǵa jiberýge suranady. Úıinde jubaıy, ájem Rahıma apam men eki balasy – uly Ámirhamza men qyzy Ámre qalsa da, solardyń bolashaǵyna qaýip tónbesin degen zor nıetpen maıdanǵa attanýǵa qulshynady. Solaı atam 1941 jyldyń soǵys bastalǵan alǵashqy aıynda Qyzyl Týly Tartýskıı gvardııashylarynyń 664-shi atqyshtar dıvızııasy quramyna jasaqtalyp sapqa turady jáne Lenıngrad túbindegi qan maıdanǵa attanady. Aǵa jasy 43-ke kelse de fashızmdik jaý basqynshylarynyń Lenıngradty qorshaýǵa alyp, jaýlap alamyz degen úmitin kúl-talqan etýde atam ózge de jaýyngerlermen birge jan aıamaı shaıqasypty. Lenıngrad qalasynyń jaýǵa berilmeı, basqynshy jaýdyń qorshaýyn buzyp shyǵýynda atamnyń da eseli eńbegi bar dep bilemin. Biraq, ókinishke oraı, 1943 jyly atamnan habar úziledi, ájem Rahıma men eki balasy ony úkilegen úmitterin úzbeı kútedi. Solaı 1945 jyldyń Jeńisti jańǵyryǵyn estıdi, alaıda atam Kıizbaı úıine oralmaıdy, qaraly hat ta kelmeıdi, esh habarsyz ketedi. Atamnyń tuńǵysh uly Ámirhamza oǵan izdeý de salady, biraq bári de esh nátıjesiz bolady. Ámirhamza atam, óz urpaǵyna, ıaǵnı bizderge ol kisiniń adamgershiligi, batyrlyǵy men ójettiligi týraly únemi ósıet qyp aıtyp júretin...
Atam Ámirhamza ómirden ótken soń, Kıizbaı atamnyń nemeresi Alık Elıýbaev ony izdeýge kirisedi. Qazaqstannyń arhıvinen atam týraly eshbir qujat ta, málimet te tabylmaǵan soń, Reseı Federasııasynyń ortalyq arhıvine hat joldaıdy. Solaı 2008 jyly Reseıdiń ortalyq arhıvinen jaýap hat keledi, onda Almaty oblysy Gvardeısk aýdandyq áskerı komıssarıatymen Keńes Odaǵy áskeriniń qataryna shaqyrylǵan 53-shi atqashtar dıvızııasy 644 atqyshtar polkiniń quramynda shaıqasqan pýlemetshi qatardaǵy Kıizbaı Ospanov 1943 jyly 15-shi aqpanda Lenıngrad oblysy Zalýchnyı aýdany Bolshoe vstrechnoe aýylynyń túbinde bolǵan qandy urysta erlikpen qaza tapty jáne sol jerde jerlengen delingen. Atam týraly bar málimet osy ǵana. Erlikpen qaza tapqan ol kisiniń esimi Qyzyl Týly Tartýskıı atqyshtar dıvızııasynyń máńgilik eske alý kitabyna engizildi.
Qazirgi ýaqytta atam Kıizbaıdyń jolyn qýyp, men de Qazaqstan Respýblıkasynyń Qarýly Kúshteri qataryna sapqa turdym. Ol kisiniń bizder, urpaǵy úshin janyn qıǵany, bizdiń jarqyn bolashaǵymyz úshin eren erlik kórsetkeni biz úshin uran. Men de atamnyń áskerıler dınastııasyn jalǵastyramyn jáne el basyna kún týǵanda etgimmen sý keshýge ázirmin. Ol kisiniń esimi men jasaǵan erligi urpaǵymen birge máńgi jasaıdy! Erlik – eldiktiń qasıeti, erlerdi jer jutsa da, el umytpaıdy», – deıdi Kıizbaı Ospanovtyń shóberesi Aıdos Saǵyndyquly Baıshaǵyrov «Egemen Qazaqstan» gazetiniń redaksııasyna joldaǵan júrekjardy esteliginde.
ALMATY
