Áli de abaı bolǵan durys

Eki aıǵa jýyq ýaqyt oqshaýlaný jaǵdaıynda boldyq. Osydan ne túıdik?

Birinshiden, Prezıdent Qasym-Jomart Toqaev barlyq qajetti sharalardy der kezinde jasady. Tótenshe jaǵdaı rejimin engizý arqyly indettiń jappaı taralýynyń joly kesildi.

Ekinshiden, Tótenshe jaǵdaı rejimin qamtamasyz etý jónindegi memlekettik komıssııa shyn máninde óte aýqymdy jumys atqardy. Halyqtyń densaýlyǵyn qorǵaý, olardyń tabysyn arttyrý jáne bıznesin qoldaý úshin 500-ge jýyq sheshim qabyldanyp, júzege asyryldy.

Úshinshiden, densaýlyq saqtaý salasynyń qyzmetkerleri aýyr synaq alańynda adal qyzmet atqardy. Kún demeı, tún demeı, asqan janqııarlyqpen indetke qarsy arpalysty.

Tórtinshiden, halqymyz aýyzbirshilik pen tutastyq ónegesin kórsetti. Tártipke sózsiz baǵynyp, tıisti saqtyq sharalaryn jasaý, oqshaý rejimde ómir súrý sharttaryna kóndikti. Sabyr men senimdi serik etti.

Indet tolyǵymen joıylmaǵanyn eskerý qajet. Qaýiptiń beti áli tolyq seıilmegen sııaqty.  Memleket basshysy «Indettiń ekinshi kezeńi bastalyp ketýi múmkin. Sondyqtan ózimizdiń aman-saýlyǵymyzǵa, eń aldymen, ózimiz jaýapty bolýymyz kerek. Indet qaıta órshigen jaǵdaıda Úkimet naqty shuǵyl is-qımyl josparyn daıyndaıdy», dep málimdedi. Sondyqtan aýa jaıylmaı, tártip pen saqtyq sharalaryn saqtaý óte mańyzdy.

Endi tótenshe jaǵdaı rejimin qamta­masyz etý jónindegi komıssııa Ekono­mıkalyq ósimdi qalpyna keltirý jónin­degi memlekettik komıssııa bolyp qaıta qurylatyn boldy. Bul – durys sheshim.

Sonymen qatar ekonomıkanyń bir­qatar salasy  turalap qalǵany shyndyq. Eńbekke jaramdy halyqtyń jartysyna jýyǵynyń tabysy azaıdy. Indettiń bas­talýy naǵyz qazaqtyń «uzynsary» –  jýannyń jińishkerip, jińishkeniń úziler shaǵyna tap keldi. Egin egý, mal baǵý, óndiris oryndarynyń jumysyn retteý máselelerinde biraz qıyndyq týyn­daýy múmkin. Prezı­dent: «Azamattardy qoldaý men bıznesti damytýǵa arnalǵan osy jáne basqa da sharalardy júzege asyrý úshin Eko­nomıkalyq ósimdi qaıta qalpyna keltirý jónindegi keshendi jos­par ázirlenip jatyr. Bul jospar jýyq arada bekitiledi», dep bul tarapta bári eskeriletinin jetkizdi.

Taǵy bir qýanatyn másele – Prezıdent «5-10-20» jańa turǵyn úı jobasy qabyldanatynyn aıtty. Bul baspanasyz júrgen talaı adamnyń keý­desine úmit otyn uıalatty.

Bir sózben aıtqanda, jaǵdaı baqylaýda. Memleket qajet sharalardyń bárin jasap jatyr. Bizge sabyr men tózim qajet. Sosyn áli de abaı bolý kerek.

Nurtóre JÚSIP,

Parlament Senatynyń depýtaty