Onda Qazaqstan Respýblıkasynyń keıbir zańnamalyq aktilerine Qarýly Kúshterdiń, basqa da áskerler men áskerı quralymdardyń arsenaldary, bazalary men qoımalary janyndaǵy tyıym salynǵan aımaqtar men tyıym salynǵan aýdandar máseleleri boıynsha ózgerister men tolyqtyrýlar engizý týraly, sondaı-aq elimizdiń keıbir zańnamalyq aktilerine tótenshe jaǵdaı máseleleri boıynsha ózgerister men tolyqtyrýlar engizý týraly zań jobalary qaraldy.
Senatorlar nazaryna birinshi usynylǵan, Qazaqstan Respýblıkasy Parlamenti depýtattarynyń bastamasymen ázirlengen zań jobasynyń negizgi maqsaty Qarýly Kúshter, basqa da áskerler men áskerı quralymdar arsenaldarynyń, bazalary men qoımalarynyń jumys isteý qaýipsizdigin qamtamasyz etý, sondaı-aq oq-dárilerdi saqtaý barysynda tótenshe jaǵdaı týyndaýy múmkin bolǵan jaǵdaıda halyqty qorǵaý salasyndaǵy zańnamany jetildirý bolyp tabylady.
Senator Nurjan Nursıpatov óz baıandamasynda Memleket basshysy Q.Toqaev 2019 jylǵy 2 qyrkúıektegi Qazaqstan halqyna Joldaýynda azamattardy tabıǵı jáne tehnogendik sıpattaǵy tótenshe jaǵdaılardan qorǵaýǵa erekshe nazar aýdarý qajettigin atap ótkenin habarlady.
«Biz, depýtattar jumys barysynda oq-dárilerdi saqtaýǵa arnalǵan arsenaldar, bazalar men qoımalardyń janynda tyıym salynǵan aımaqtar men tyıym salynǵan aýdandardy belgileý bóliginde birqatar kemshilikter men problemalardyń bar ekenine kóz jetkizdik. Bul kemshilikter Arys qalasyndaǵy barshaǵa belgili oqıǵa barysynda ashyldy», dep atap ótti N.Nursıpatov.
Senator onyń ishinde arsenaldarǵa, bazalar men qoımalarǵa irgeles aýmaqtardaǵy halyqtyń, ǵımarattar men qurylystardyń qaýipsizdigi máseleleri tolyq kólemde sheshilmegenin aıta kelip, memlekettik jáne jergilikti atqarýshy organdardyń oq-dárilerdi saqtaý qaýipsizdigin qamtamasyz etý jónindegi is-qımyldaryn úılestirý deńgeıiniń tómendegine toqtaldy. Sonymen qatar qarý-jaraq qoımalarynyń janynda ǵımarattar men qurylystardy zańsyz salý faktileri de oryn alǵan.
Senator Qaırat Qojamjarov qosymsha baıandama jasady jáne arsenaldardyń, bazalar men áskerı qoımalardyń qaýipsiz jumys isteýine jaǵdaı jasaýǵa baǵyttalǵan osy zań jobasynyń mańyzyna toqtaldy.
Elimizdiń keıbir zańnamalyq aktilerine tótenshe jaǵdaı máseleleri boıynsha ózgerister men tolyqtyrýlar engizý týraly zań jobasy odan keıin talqyǵa salyndy.
Ulttyq ekonomıka mınıstriniń orynbasary Aıgúl Shaıymova óz baıandamasynda zań jobasynda tótenshe jaǵdaı kezinde memlekettik basqarýdyń jumys isteý tetikteri belgilenetinin aıtty. Ol úshin «Tótenshe jaǵdaı týraly» jáne «Quqyqtyq aktiler týraly» zańdarǵa túzetýler engiziledi.
Senator Tóleýbek Muqashevtyń aıtýynsha, zań jobasy tótenshe jaǵdaı kezinde azamattardyń qaýipsizdigin qamtamasyz etý jáne Qazaqstan Respýblıkasynyń konstıtýsııalyq qurylysyn qorǵaý úshin shuǵyl sharalar qabyldaý maqsatynda ázirlengen.
«Zań jobasyn qabyldaý barlyq memlekettik júıeniń áleýmettik-ekonomıkalyq turaqtylyǵy men ornyqtylyǵyn, sondaı-aq daǵdarysqa qarsy tıimdi saıasat arqyly ulttyq qaýipsizdikti qamtamasyz etýge múmkindik beredi», - dedi ol.
Zań jobalary Palatanyń qaraýyna jiberildi.
