Qalamyzdyń jas sýretshileri qaýipti indetpen kúresip júrgen osynaý dárigerlerge arnap sáýir aıynda birinshi mýraldy salǵan edi. Mýraldyń alǵashqysy qaladaǵy Qurmanǵazy men Á.Sháripov kósheleriniń qıylysyndaǵy turǵynúıdiń qabyrǵasynda paıda boldy.
Osy kúnderi qalada ekinshi mýral salynyp, bul týraly Almaty qalasynyń ákimi Baqytjan Saǵyntaev óziniń áleýmettik paraqshasynda: «Bizdiń sýretshiler koronavırýspen kúrestiń, Jerdi qutqaryp qalýdyń sımvolyn beıneleıtin mýral saldy. Bul – densaýlyǵymyz ben qaýipsizdigimizdi qorǵaýda janyn pıda etip júrgen dáriger, áskerıler men polıseılerge alǵys retinde salynǵan qaladaǵy ekinshi graffıtı» dep alǵys sezimmen jazady.
Mine, osylaısha áli de kún saıyn, sát saıyn medısına qyzmetkerleri óz bastaryn qaterge tigip, COVID-19-ǵa qarsy kúreste aldyńǵy shepte eńbek etip júr.
Almatylyqtar qaýipti indettiń beti qaıtyp, ómirimiz qalypty arnaǵa túskende, osy mýralǵa qarap, aq halatty abzal jandardyń basynan keshken kúnderdi erekshe rızashylyqpen eske alyp otyratyn bolady.
