Medısınalyq keshen 17 gektar jer ýchaskesinde ornalastyrylady, al qurylystyń jalpy aýdany 111 myń sharshy metrdi quraıdy. Qazirgi ýaqytta nysannyń qurylys daıyndyǵy 50%-ǵa jetti.
Jobalaý jáne qurylys jumystary qoldanystaǵy ulttyq talaptar men medısınalyq mekemelerdi josparlaýdyń zamanaýı halyqaralyq tásilderin eskere otyryp júrgizilip jatyr.
Qyzylorda oblysynda 300 oryndyq kópbeıindi aýrýhana salynyp jatyr
Bolashaq aýrýhana emdeý-dıagnostıkalyq kómektiń tolyq sıklin qamtamasyz etetin zamanaýı ıntegrasııalanǵan medısınalyq keshen retinde jobalanǵan. Joba eki negizgi stasıonarlyq korpýsty – terapııalyq jáne hırýrgııalyq korpýstardy qamtıdy.
Keshenniń negizgi elementi eki stasıonarlyq korpýstyń arasynda ornalasatyn úsh qabatty klınıkalyq-dıagnostıkalyq ortalyq bolady. Bul ortalyq aýrýhananyń klınıkalyq jáne qosalqy bólimshelerin biriktiretin biryńǵaı platforma qyzmetin atqarady.
Bolashaq medısınalyq keshenniń quramyna sondaı-aq 38 tósekke arnalǵan qarqyndy terapııa bólimshesi, 10 tósekke arnalǵan perzenthana bólimshesi jáne 63 tósekke arnalǵan kúndizgi stasıonar kiredi. Jańa aýrýhanada jyl saıyn 20 myńnan astam pasıent em alady dep kútiledi.
Jobada medısınalyq keshenniń tıimdi jumys isteýin qamtamasyz etetin zamanaýı avtonomdy ınfraqurylym qurý da kózdelgen. Atap aıtqanda, jedel járdem kólikterin dezınfeksııalaý pýnktin jáne shuǵyl medısınalyq evakýasııaǵa arnalǵan tikushaq alańyn salý josparlanyp otyr. Bul aýyr jaǵdaıdaǵy pasıentterge jedel medısınalyq kómek kórsetýge múmkindik beredi.
Atalǵan jobany iske asyrý óńirde mamandandyrylǵan jáne joǵary tehnologııalyq medısınalyq kómekti kórsetý múmkindikterin aıtarlyqtaı keńeıtip, medısınalyq qyzmetterdi kútý ýaqytyn qysqartyp, pasıentterdiń aýrýhanada bolý jaılylyǵyn arttyrýǵa múmkindik beredi.
Eki jylǵa josparlanǵan qurylys jumystarynyń negizgi kezeńi aıaqtalǵannan keıin jobada nysanǵa bes jyldyq tehnıkalyq qyzmet kórsetý kezeńi de kózdelgen. Bul ınfraqurylymnyń senimdi jumysyn qamtamasyz etip, medısınalyq ortanyń joǵary sapasyn saqtaýǵa múmkindik beredi.
Qazirgi ýaqytta nysandaǵy qurylys jumystary josparly rejımde júrgizilip jatyr, al jańa kópbeıindi aýrýhana 2027 jyly paıdalanýǵa beriledi.
Aıta keteıik, buǵan deıin Soltústik Qazaqstanda donor úsh pasıenttiń ómirin saqtap qalǵanyn habarlaǵan edik.
