«Bolashaq» halyqaralyq stıpendııasyna úmitkerlerdi irikteýdiń jańa Erejeleri barlyǵyna birdeı múmkindikter usynady. Barlyq kvotalyq sanattar alynyp tastaldy.
Osy jyldan bastap «Bolashaq» stıpendııasynyń konkýrsyna aýyldyq eldi mekenderden kelgen úmitkerlerdi qospaǵanda, jetekshi sheteldik joǵary oqý oryndarynan shartsyz shaqyrtýǵa ıe talapkerler ǵana qatysa alady.
О́zgerister eń aldymen «Bolashaq» stıpendııasyna úmitkerlerdi konkýrstyq irikteý prosesine, sondaı-aq konkýrsqa qatysýdyń bastapqy talaptaryna qatysty.
Konkýrstyq kezeńder sany 6-dan 3-ke deıin qysqartyldy, atap aıtqanda ýájdemelik pen usynys hattardy baǵalaýdyń irikteý kezeńderi, sonymen qatar memlekettik jáne shet tilderin bilýge arnalǵan kezeńder alynyp tastaldy. Úmitkerler ózdiginen test tapsyryp, qujat ótkizgen kezde memlekettik tildi bilý týraly sertıfıkattaryn usynýy kerek. Aýyldyq jerlerden kelgen úmitkerler qosymsha shet tilin bilý týraly sertıfıkattardy usynady.
Memlekettik tildi bilý deńgeıin anyqtaýǵa arnalǵan synaq Ulttyq testileý ortalyǵynyń aımaqtyq fılıaldarynda ótkiziledi.
Irikteý kezeńderi mynalardy qamtıdy:
1-kezeń: Intellektýaldy qabilet deńgeıin, jeke jáne iskerlik qabiletterin, shetelde oqýǵa psıhologııalyq daıyndyǵyn anyqtaıtyn keshendi test;
2-kezeń: Táýelsiz sarapshylar komıssııasynyń múshelerimen jeke suhbat;
3-kezeń: Shetelde kadrlardy daıarlaý jónindegi respýblıkalyq komıssııanyń otyrysy.
Aıta keterligi, jańa Erejede aldyn-ala tildik oqytý alynyp tastaldy. Ol tek aýyldyq jerlerden kelgen talapkerler úshin saqtalady jáne 6 aı merzimi ishinde aǵylshyn tilin úırený Qazaqstan Respýblıkasynyń aýmaǵynda ótkiziledi.
«Bolashaq» stıpendııasyna úmitkerlerdi irikteýdiń jańa Erejelerine sáıkes, aýyldyq eldi mekenderden qatysatyn úmitkerler tek sońǵy 3 jyl ishinde aýyldyq jerlerde turyp jáne onyń 2 jylyn jumys isteýge arnaǵan jaǵdaıda ǵana konkýrsqa qatysa alady.
Basymdyq berilgen mamandyqtar tizbesi eńbek naryǵy qajettilikteriniń orta merzimdi boljamyn eskere otyryp, QR Bilim jáne ǵylym mınıstrligi arqyly jasalady.
2020 jylǵa arnalǵan «Bolashaq» stıpendııasyn taǵaıyndaý konkýrsynyń jeńimpazdaryna usynynylatyn jetekshi sheteldik joǵary oqý oryndarynyń, sheteldik uıymdardyń jáne tildik kýrstar tiziminiń jobasy qazir kelisilý ústinde.
Álemniń jetekshi ýnıversıtetteri tiziminiń jobasy mynadaı halyqaralyq akademııalyq reıtıngter boıynsha anyqtalady: QS World University Rankings, Academic Ranking of World Universities, Times Higher Education World University Rankings, The U. S. News & World Report Best Global University Ranking.
Sonymen qatar, Táýelsiz sarapshylar komıssııasynyń (TSK) quramymen jumys reglamentine ózgerister engizilýde. Komıssııa jumysyn qatań retteı otyryp, onyń ashyqtyǵyn barynsha kúsheıtý josparlanýda.
«Bolashaq» stıpendııasyna qujattardy qabyldaý jáne stıpendııa taǵaıyndaý konkýrsyn ótkizý merzimi qujattardy qabyldaý ýaqytynan 10 (on) kúntizbelik kún buryn Qazaqstan Respýblıkasynyń buqaralyq aqparat quraldarynda jarııalanady.
Qaýly Qazaqstan Respýblıkasy Úkimetiniń ınternet-resýrsynda alǵash resmı jarııalanǵan kúninen bastap qoldanysqa engiziledi.
