Infografıkany jasaǵan Amangeldi Qııas, «EQ»
Prezıdent pandemııa qanshama salanyń jumysyna tusaý bolǵanyn, ilgerindi ister irkilip qalǵanyn aıta kele, daǵdarys kezindegi jáne odan keıingi damýdyń basym baǵyttaryn atap kórsetti. Osynaý syn saǵatta halyqtyń amandyǵymen qosa ál-aýqatynyń da jaqsy bolýy úshin ekonomıkany damytýǵa erekshe serpin berý mańyzdy bolyp tur. Sondyqtan Memleket basshysynyń málimdemesinde negizinen el turmysyn kóterý máselesi basa aıtyldy.
Ulttyq bıznesti qoldaýǵa basymdyq berý erekshe nazarǵa alynbaq. Bizdiń kásipkerler eýrazııalyq ekonomıkalyq keńistikte kóptegen kedergige tap keledi. Mysaly, Reseı, Belarýs sııaqty elderdiń konkýrstaryna qatysa almaıdy. Sondyqtan biz, eń aldymen, ózimizdiń bızneske barynsha jaǵdaı jasap, zańǵa ózgerister engizýimiz kerek. Bul turǵyda depýtattar kezinde biraz usynys jasady. Prezıdenttiń pármenimen osy baǵyttaǵy jumysty kúsheıtýdiń múmkindigi týyp tur.
Málimdemede ındýstrııalandyrý úderisine qatysty ustanymdy qaıta qaraý nazarǵa alyndy. Daıyn taýarlardy syrttan ákelgennen góri otandyq óndiristi myqtap qolǵa alý – qazirgi kúnniń talaby. Memleket basshysynyń Infraqurylymdyq baǵdarlamalar boıynsha jergilikti múmkindikti paıdalaný deńgeıin 40 paıyzdan 60-70 paıyzǵa deıin jetkizý kerek degeni óte oryndy. Aıtalyq qurylys materıaldaryna qosa aýyl sharýashylyǵy tehnıkalaryn da ózimizde shyǵaratyn bolsaq, qolymyz biraz uzaryp qalatyn edi. Sondyqtan osyndaı alǵa bastaıtyn jumysty qolǵa alǵan kásipkerlerdi barynsha qoldap, salyqtan bosatýymyz qajet.
Bızneske keńinen múmkindik jasasaq, ol ári qaraı damyp, biraz máseleniń sheshilýine septigin tıgizedi. О́ndiris kúsheıip, jumys oryndary kóptep ashylyp, halyqtyń da eńbekpen qamtylý kórsetkishi joǵarylaıdy. Al bıznestiń aıaqtan nyq turyp ketýi úshin qarjylyq qoldaý qajet. Sondyqtan kásipkerliktiń kókjıegin keńeıtýge bankterdiń qolǵabys etkeni mańyzdy. Iаǵnı kásipkerlerge qarastyrylatyn nesıeniń paıyzyn tómendetý kerek.
Qazirgi qysyltaıań shaqta azamattarǵa túrli áleýmettik kómek berilip, erekshe qamqorlyq jasalyp jatyr. Endigi jerde otandastarymyzdyń turmysy jaqsy bolýy, tabysyn arttyrýy úshin ekonomıkany damytýǵa serpin berý kún tártibindegi basty másele bolmaq. Bul baǵytta Prezıdenttiń tapsyrmalary tıimdi júzege asady dep senemin.
Sapar AHMETOV,
Parlament Májilisiniń depýtaty
