Búgin Kóliktegi bas memlekettik sanıtarlyq dáriger qaýly qabyldady. Qaýlyǵa sáıkes joǵary temperatýrasy nemese jótel, entigý, tynys alýynyń qıyndaýy sııaqty aýrý belgileri bar adamdar áýejaı ǵımaratyna jáne bortqa jiberilmeıdi. Mundaı jolaýshylar karantınge jiberilip, oqshaýlanady.
Kóliktegi bas memlekettik sanıtarlyq dáriger Sádýaqas Baıǵabylovtyń aıtýynsha, atalǵan úsh qalaǵa qatynaıtyn áýe tasymaly kezinde áleýmettik qashyqtyq, saýaldama, maskalyq rejim, termınal ǵımaratyna shyǵaryp salatyn adamdardy jibermeý, baılanyssyz termometrııa jáne basqa da talaptar qatań saqtalýy tıis.
Buǵan deıin koronavırýstyq ınfeksııa boıynsha sanıtarlyq-epıdemıologııalyq jaǵdaıdyń turaqtanýyna qaraı ishki avıareıster kezeń-kezeńmen qaıta qalpyna keltiriletini aıtylǵan bolatyn. Sondyqtan ázirge ishki áýe reıster tek Nur-Sultan men Almaty qalalarynan mańyzy bar qalalarǵa ǵana ashyq. Al óńirler arasyndaǵy áýe tasymaly áli qalpyna keltirilmeıdi.
