Birinshi bolyp «aldyńǵy shepke» dárigerlik kýáligi bar QazUÝ-dyń medısına jáne densaýlyq saqtaý fakýltetiniń 50-den astam magıstranty men doktoranty attanyp, syrqatty juqtyrǵan jáne olarmen baılanysta bolǵan adamdardy qabyldaıtyn aýrýhanalarda janqııarlyqpen jumys isteýde. Qazirgi sátte ınfeksıonıster, pýlmonologtar jáne reanımatologtar Almaty qalasynyń medısınalyq mekemelerinde táýlik boıy qyzmet atqarýda. Epıdemıologtar qorshaýǵa alynǵan karantındik nysandar men blok beketterinde jumys istep, sondaı-aq naýqastar men olarmen baılanysta bolǵan adamdardy tasymaldaýmen aınalysýda.
Sonymen qatar, 20 ıntern-dáriger karantın kezeńinde dertke shaldyqqandarmen baılanysta bolǵan naýqastarǵa arnalǵan provızorlyq stasıonary ashylǵan QazUÝ-dyń medısınalyq dıagnostıkalyq ortalyǵynda jáne №1 qalalyq aýrýhanada eriktiler retinde ortaq iske óz úlesterin qosyp jatyr. Sondaı-aq densaýlyq saqtaý saıasaty jáne ony uıymdastyrý kafedrasynda shuǵyl túrde birneshe ret qoldanylatyn betperdeler tigý isi uıymdastyrylǵan. Oqytýshylar dezınfeksııalaý jáne qorǵaý quraldary bar arnaıy paketter jınaqtap, olardy áriptesteri men stýdentterge tabys etti.
QazUÝ ǵalymdary koronavırýstyń taralý máselelerin sheshýge belsendi túrde atsalysýda. Osylaısha, «Jańa hımııalyq tehnologııalar men materıaldar» ǴZI-da hırýrgtar men medısınalyq qyzmetkerlerdiń qoldaryn, sondaı-aq operasııalyq jáne ıneksııalyq óristerdiń terilerin zararsyzdandyrýǵa arnalǵan antıseptık jasaldy. Antıseptıktiń tıimdiligi M.Aıqymbaev atyndaǵy ulttyq asa qaýipti ınfeksııalar ǵylymı ortalyǵynyń akkredıtasııalanǵan zerthanasynyń qorytyndysymen rastaldy.
Hımık ǵalymdar, sonymen qatar, hlorgeksıdın negizinde gıdrogeldi antıseptıkti jasap shyǵardy. Sýly-spırtti eritindilerge qaraǵanda, onyń áseri uzartylǵan áreketke ıe. Medısınalyq-bıologııalyq zertteýler osyndaı dezınfeksııalyq quralmen óńdelgen qabattardaǵy antıseptıkalyq qasıetter bir táýlikten artyq saqtalatyndyǵyn kórsetti. Tıisti memlekettik tirkeýden ótkennen keıin kúzge taman «MEU Asem» JShS-men birlesip óndiristi birden iske qosý josparlanýda.
Búgingi tańda QazUÝ ǵalymdary ózderi ázirlegen medısınalyq maqsattaǵy buıymdardy zararsyzdandyrýdyń radıasııalyq ádisin, sondaı-aq polımerler negizindegi lateksti qolǵaptardy, bir ret qoldanylatyn dıagnostıkalyq jıyntyqtardy óndirýge arnalǵan jańa modıfıkasııalanǵan materıaldar men kompozıtterdi synaqtan ótkizip otyr.
QazUÝ Tehnoparkiniń qyzmetkerleri Janý máseleleri ınstıtýtynyń áriptesterimen birge Almaty qalasyndaǵy medısınalyq mekemelerge óteýsiz berilgen arnaıy qorǵanysh shlemderiniń toptamasyn jasap shyǵardy. Shaǵyn serııaly óndiristi uıymdastyrý boıynsha jumystar júrgizilýde.
#Bizbirgemiz respýblıkalyq qozǵalysy jáne QazUÝ stýdentteriniń bastamasymen ótkizilgen «Qayirymdy qogam» chellendji sheńberinde ýnıversıtettiń volonterleri men oqytýshylary koronavırýstyń taralýyna qarsy kúreske tartylǵan qyzmet ókilderine kómek kórsetý úshin qarajat jınap, sharaǵa beı-jaı qaramaıtyn, járdemdesýge ázir adamdardy tartýda. Olar medısına qyzmetkerlerine jáne blok beketterindegi ishki ister organdarynyń qyzmetkerlerine ystyq tamaq jetkizýdi uıymdastyrdy. Sonymen qatar, azyq-túlik ónimderi men jeke qorǵaný quraldary jetim balalarǵa arnalǵan «Januıa» arnaıy keshenine jáne eline barýǵa múmkindigi joq QazUÝ-dyń sheteldik stýdentterine berildi. Ýnıversıtet óziniń 710 oryndyq jatahqanalarynyń birin usynyp, onda Almaty qalasynyń medısınalyq qyzmetkerleri ornalastyryldy.
Karantın kezinde QazUÝ qashyqtyqtan oqytý júıesine tez ári, esh qıyndyqsyz aýysty. Áleýmettik jaýapkershilik aıasynda ýnıversıtet oqý úderisin súıemeldeý úshin QazUÝ ázirlegen «Ýnıver» sandyq júıesin qoldanatyn joǵary oqý oryndaryna tegin qyzmet kórsetý jáne keńes alý múmkindigin berdi. QazUÝ qurǵan moocs.kz biregeı sandyq bilim berý resýrsy asa tanymaldyqqa ıe boldy jáne barlyq nıet bildirýshilerge tegin qol jetimdi.
COVID-19 búkilálemdik pandemııasy elder arasynda praktıkalyq tájirıbe men jańa ǵylymı-tehnıkalyq ázirlemelermen ýaqtyly almasý qajettiligin aıqyndady. Medısına jáne densaýlyq saqtaý fakýlteti Kanada men Germanııanyń jetekshi pýlmonologtary, vırýsologtary jáne epıdemıologtarymen birlese otyryp, koronavırýsty emdeý, dıagnostıkalaý jáne taralýynyń aldyn alý tájirıbesi týraly beınetúsirilimder serııasyn daıyndady.
Elimizdiń jetekshi ýnıversıteti qıyn kezeńdi tek birlese otyryp qana eńserýge bolatyndyǵyna jáne árbir adamnyń qaýipti indettiń taralýyna qarsy turýǵa óz qolynan kelerlik úles qosýy qajet ekendigine senimdi.
ALMATY
