– Tótenshe jaǵdaı men karantın engizilgen kezde Ortalyqqa jumys formatyn jedel qaıta qurýǵa týra keldi. Bizdiń barlyq kúsh-jigerimiz turǵyndar men pasıentter úshin kórsetiletin qyzmetterdi barynsha saqtaýǵa baǵyttaldy. AITV-aýhaldy adamdardyń ómiri men densaýlyǵy – bizdiń basty nazarymyzda, – deıdi Almaty qalasy JITS-tiń aldyn alý jáne oǵan qarsy kúres ortalyǵynyń bas dárigeri Marat Tókeev.
Barshamyz úshin qıyn kúnderde ortalyq mamandary kún saıyn pasıentterge qajetti antıretrovırýstyq (ARV) preparattardyń irkilýine jol bermedi. COVID-19 aldyn alý maqsatynda olardy jetkilikti mólsherde qoldaryna berdi. AITV-men ómir súretin adamdardyń bir bóligi Almaty oblysynda qalyp qoıǵany belgili bolǵanda, dárigerler dári-dármekterdi qala shekarasyna deıin jetkizýdi uıymdastyrdy. Sonymen qatar pasıentterge jeke qorǵaný quraldary – maskalar, qolǵaptar, sanıtaızerler berildi. Jaǵdaıdyń kúrdeliligi anaǵurlym ónimdi nátıjege jetkizdi – budan buryn ARV-terapııamen emdeý paıdasyn joqqa shyǵarǵan AITV-pozıtıvti adamdar ony qabyldaýǵa sheshim qabyldady.
JITS ortalyǵynyń dárigerlerine Almaty qalasy ákimdiginiń jáne qoǵamdyq densaýlyq basqarmasynyń mamandary úlken qoldaý kórsetti.
TJ kezinde dárigerler «Revansh» ómirde qıyn jaǵdaıǵa tap bolǵan adamdardy keshendi qoldaý ortalyǵyna kómek kórsetti. Ortalyq klıentteriniń arasynda – buryn qamaýda bolǵandar, esirtkige táýeldi adamdar, AITV-men ómir súretin adamdar bar. Dárigerler men medbıkeler óz erkimen jınaǵan aqshalaryna alǵashqy kezde qajet bolatyn zattardy satyp alyp ortalyqqa ákeldi: koronavırýstan qorǵaıtyn sanıtarlyq quraldar men azyq-túlik: qant, ósimdik maıy, jarmalar alyp keldi. Medısınalyq qyzmet kórsetýmen de kómektesti.
Búginde Almaty qalalyq JITS ortalyǵynda dıspanserlik esepte 3500 pasıent turady. Antıretrovırýsqa qarsy terapııaǵa qoljetimdilikti keńeıtýdiń arqasynda AITV jáne JITS-pen ómir súretin adamdar arasynda ólim-jitimniń tómendeý úrdisi baıqalady. Bul olarǵa tolyqqandy ómir súrýge, jumys isteýge jáne qoǵamdyq qyzmetpen belsendi aınalysýǵa múmkindik beredi.
Aıtqandaı, alǵash ret dúnıejúzilik JITS-tan qaıtys bolǵandardy eske alý kúni (World Remembrance Day of ITS Victims) 1983 jyly amerıkanyń San-Fransısko qalasynda atap ótildi.
ALMATY
