Jumys tobynyń 42 otyrysy ótti, 1 000-nan astam túzetý qaraldy, otandyq jáne halyqaralyq sarapshylardy, DDSU ókilderin tarta otyryp, 11 kópshilik talqylaý ótkizildi.
Eljan Birtanov vaksınasııa máselesine toqtalyp ótti. «Sońǵy kezde áleýmettik jelilerde Kodekstiń qabyldanýyna qarsy talqylaýlar júrgizilip jatyr, sonyń ishinde sapasyz vaksınalar, josyqsyz satyp alý men vaksınalardy durys tasymaldamaý, medısınalyq qıyndyqtar jáne vaksınadan bas tartýshylar sanynyń kóptigi týraly shyndyqqa janaspaıtyn áńgimeler aıtylýda. Bul qoǵamdyq sanany ashyq túrde manıpýlıasııalaý!
Qazaqstanda Vaksınalaý májbúrlep júrgizilmeıdi, olaı bolǵan da emes! Búkil álemdegi sekildi bizdiń elimizde de erikti túrde salynatyn jáne mindetti vaksınalar bolady. Ár jaǵdaıda ata-analardyń aqparattandyrylǵan kelisimi nemese vaksınasııadan bas tartý quqyǵy bar! Ekpe almaǵan balalar quqyǵyn shekteıtin eshqandaı norma joq! Ujymdyq ımmýnıtetti, ıaǵnı balabaqshalarǵa baratyn barlyq balalardyń densaýlyǵyn qorǵaýdy qamtamasyz etetin bir ǵana norma bar.
Statıstıkaǵa súıensek, 2019 jyly bizde 4 841 334 balaǵa vaksına salyndy, onyń ishinde 6 003 balaǵa ǵana salynbady (bas tarqan). Al bul tek ‒ 0,12%. Asqyný faktilerine toqtalsaq, 2019 jyly ekpe egilgen 4 841 334 balanyń ishinde tek 143-inde ǵana jaǵymsyz belgiler baıqaldy (temperatýranyń kóterilýi, isiný, teriniń qyzarýy), bul ‒ 0,003%! Sonymen qatar Qazaqstanda 2019 jyly vaksınadan qaıtys bolǵan balalar tirkelmegen.
Sandar bárine dálel. Aıta ketý kerek, Qazaqstanda árbir vaksına tıisti óndiristik tájirıbeniń (GMP) halyqaralyq standarttaryna sáıkes keletin qaýipsizdikke, tıimdiligine jáne sapasyna kóp satyly tekserýden ótkiziledi», — dep naqtylady E. Birtanov.
