Ábishshe aıtsaq, «...ol tirisinde – eliniń jel jaqtaǵy Panasy, yq jaqtaǵy Saıasy bola bilgen Azamat. Jaýdan eldi arashalaǵan Batyr. Daýda ádiletti arashalaǵan Qazy. Ozbyrlyqtan Obal men Saýapty arashalaǵan Pirádar. Eli men jerin sheksiz súıgen Asyl Azamat, Abzal Adam. ...Álsizge Medet, Kúshtige Aıbat, Zaryqqanǵa Jebeý, Taryqqanǵa Demeý, Asqanǵa Tosqan, Sasqanǵa Saıa, Urpaqqa Ustaz, Ulysqa Uran, El Iesi, Jer Kıesi».
Ǵasyrlar boıy jurtynyń jadynan joǵalmaǵan, júreginen joıylmaǵan Beket ata esimi – tentekti tezge salar tárbıe men taǵylym mektebi. О́zderinen burynǵy babalar jolyn jalǵastyrǵan búgingi urpaq Pir ata rýhyna qurmet pen súıispenshilikti joǵaltqan joq. Beket atanyń mereıtoıy qarsańynda on jyl buryn salynyp halyq ıgiligine usynylǵan «Ata joly» jańǵyrtylyp-jańartylyp qoldanysqa qaıta qosyldy.
Búginde Oǵylandy taýyndaǵy Beket ata jerlengen jer – halyq jıi zııarat etip baratyn oryn. Ásirese týrıstik salany damytýǵa basymdyq bergen elimizde Mańǵystaýdyń kórikti-kórnekti jerlerine týrısterdi kóptep tartý baǵytynda tabıǵı sulý oryndarmen birge tarıhı-mádenı nysandardyń, tarıhı eskertkishterdiń alar orny zor. Qazirgi tańda Mańǵystaý óńirinde on úsh myńnan astam tarıhı-mádenı nysandar zerttelip, qujattaldy. Tórt júz qyryqtan astam eskertkish memlekettik qorǵaýǵa alyndy, olardyń jıyrma biri respýblıkalyq mańyzǵa ıe. Eki júz qyryq toǵyz arheologııalyq eskertkishi tolyqtaı zerttelgen desek, olarǵa tas dáýiri sońyndaǵy turǵyn keshender, qola dáýiri men erte temir dáýirindegi dinı-jerleý nysandary, ortaǵasyrlyq eski qalalar, bekinister, Uly Jibek joly boıynda ornalasqan kerýen saraılary, arheologııa, sáýlettiń úlken jáne shaǵyn formalary kiretin júz qyryq keshendik ansamblder, sonymen qatar sáýlet pen qurylys mádenıetin tanytatyn alpys eskertkish jatady. Mańǵystaýdaǵy jerasty meshitteri, qaýym-qoıylymdardaǵy qulpytastar men tamdar erekshelikteri týrısterge zor áser syılaıtyny anyq. Bul múmkindik Mańǵystaý óńirin Qazaqstandaǵy on úzdik týrıstik aımaqtyń biri retinde ereksheleıdi. Jyl ótken saıyn Kaspıı teńiziniń jaǵasy týrıster demalatyn orynǵa aınalyp, kelýshilerdiń sany arta túsýde. Al Qazaqstannyń jeti keremetiniń biri sanalatyn Beket ata jerasty meshiti jáne basqa da qasıetti oryndar ári zııarat etýshilerge, ári týrısterge mol áser, rýhanı serpilis syılaı alady.
Bıylǵy mereıli merekege oraı Beket ata meshiti men jol boıynda ornalasqan Shopan ata meshitteriniń aýmaǵy abattandyrylyp, kóne jádigerlerdi qaıta qalpyna keltirý jumystary júrgizilýde. 12 shaqyrym qashyqta jer astynan shyǵatyn tabıǵı sýǵa qubyr tartylyp, meshitke ákelindi. 2017 jyly bastalǵan «Ata joly» avtomobıl jolyn rekonstrýksııalaý jumystary jobasy eki kezeńmen júrgizildi. Alǵashqy bóliginde 5 mlrd 460 mln teńgege 51 shaqyrym jol jóndelse, ekinshi kezeńinde 4 mlrd 554 mln teńgege 46 shaqyrym jolǵa rekonstrýksııa jasalyp, asfalt tóseldi. Endigi kezekte aımaq basshylyǵynyń tapsyrmasymen Beket ata meshitine gaz jelisin tartý máselesi qolǵa alyndy. Demeýshilerdiń kómegimen aldaǵy ýaqytta bul joba da iske asady dep kútilýde.
– Áriptestermen, el aǵalarymen, «О́zenMunaıGaz» aksıonerlik qoǵamymen birge Beket atanyń basynda taǵy qandaı jumystar uıymdastyrýǵa bolatyndyǵyn aqyldastyq. Qazirgi kezdegi ózekti másele – gaz ákelý jáne kelgen sýdy tushytyp, halyq ıgiligine jaratý. Ony da aqyldastyq. Demeýshilerdiń kómegimen aldaǵy ýaqytta uıymdastyramyz dep josparlap otyrmyz. Sondaı-aq Shopan atanyń basyna da sý tartý, kógaldandyrýdy josparlap otyrmyz, – deıdi Mańǵystaý oblysynyń ákimi Serikbaı Trumov.
Beket ata esimi men rýhy urpaqtarymen birge jasaı bermek.
Mańǵystaý oblysy
