Turǵyn úı máselesi ózekti ekenin eskere otyryp, Úkimet muqtaj azamattardy pátermen qamtý boıynsha sharalar qabyldaýda. Mysaly, 2020-2025 jyldarǵa arnalǵan «Nurly jer» turǵyn úı-kommýnaldyq sharýashylyqty damytý memlekettik baǵdarlamasy qabyldandy. Ony júzege asyrý aıasynda turǵyn úımen qamtamasyz etýdiń birneshe baǵyttary qarastyrylǵan.
Áleýmettik jalǵa beriletin turǵyn úı.
Bul baǵyt sheńberinde turǵyn úı halyqtyń áleýmettik osal toptaryna jáne kóp balaly otbasylarǵa kezek tártibimen beriledi. Páterler jaldaý merzimin uzartý quqyǵyn bere otyryp, 5 jylǵa beriledi.
Sondaı-aq jumysshy jastarǵa páter jalǵa beriledi (29 jasqa tolmaǵan, Nur-Sultanda keminde eki jyl tirkeýde turǵan jáne Qazaqstan Respýblıkasy boıynsha sońǵy eki jylda turǵyn úıi joq azamattar).
Olarǵa turǵyn úı jalǵa berý merzimin uzartý quqyǵynsyz 5 jylǵa beriledi. Kórsetilgen ýaqyt ishinde azamattyń keıinnen basqa jeke turǵyn úı satyp alý úshin bastapqy jarnaǵa qarjy jınaý múmkindigi bar.
JAO-da kezekte turǵan az qamtamtylǵan otbasylaryn QTQJB arqyly nesıelendirý (Baqytty otbasy).
Bul baǵytqa kezekte turǵan kelesi sanattaǵy azamattar qatysa alady:
- kóp balaly otbasylar;
- tolyq emes otbasylar;
- múgedek balalardy tárbıelep otyrǵan otbasylar.
Osy baǵyt sheńberinde az qamtylǵan otbasylardy «Qazaqstannyń turǵyn úı qurylys jınaq banki» AQ arqyly jyldyq 2%, bastapqy jarna 10%-dan kem emes bolǵan jaǵdaıda 20 jylǵa deıingi merzimge nesıe berý kózdelgen.
Sonymen qatar ákimdikpen bastapqy jarnanyń bir mıllıon teńge kólemindegi bóligin jabý úshin turǵyn úı sertıfıkattaryn usyný qarastyrylǵan.
Áleýmettik nesıelik turǵyn úı.
Bul baǵytqa bank salymshylary bolyp tabylatyn ákimdik kezeginde turǵandar qatysa alady. Osy baǵyt sheńberinde QTQJB qaryz somasynyń keminde 20% bastapqy jarna bolǵan kezde 25 jylǵa deıingi nesıe berý merzimimen jyldyq 5%-dan aspaıtyn mólsherleme boıynsha qaryz beredi.
Aıta keteıik, Nur-Sultanda búgingi tańda 46 480 adam kezekte tur.
Onyń ishinde kóp balaly otbasylar – 4 319; halyqtyń áleýmettik jaǵynan osal toptary – 17 942, onyń ishinde múgedek balalary bar nemese olardy tárbıelep otyrǵan otbasylar – 2 023; jetim balalar-2 692; memlekettik qyzmetshiler men bıýdjettik uıymdar qyzmetkerleri – 21 436; jalǵyz turǵyn úıi apatty dep tanylǵan azamattar – 91. Zańǵa sáıkes halyqtyń áleýmettik jaǵynan osal toptary (UOS qatysýshylary men múgedekteri; jetim balalar; kóp balaly otbasylar; tolyq emes otbasylar; múgedek balalardy tárbıelep otyrǵan otbasylar; jasy boıynsha zeınetkerler; I jáne II toptaǵy múgedekter; oralmandar jáne t.b.), memlekettik qyzmetshiler, bıýdjettik uıymdardyń qyzmetkerleri, áskerı qyzmetshiler jáne jalǵyz turǵyn úıi apatty dep tanylǵan adamdar kezekke tura alady.
